Arnaýly memlekettik qor qarajaty qandaı jobalarǵa jumsalyp jatyr

ASTANA. KAZINFORM — Arnaýly memlekettik qor qarajaty esebinen 465 ınfraqurylymdyq jáne áleýmettik joba iske asyrylyp jatyr. Bul týraly búgin Úkimet otyrysynda Qarjy mınıstri Mádı Tákıev aıtty.

- Búginde Arnaýly memlekettik qor qarajaty esebinen jalpy quny 482,5 mlrd teńge bolatyn 465 ınfraqurylymdyq jáne áleýmettik joba iske asyrylýda. Munda óńirlerdi damytýǵa erekshe basymdyq berilip otyr. Onyń ishinde 205 mlrd teńge 258 sýmen jabdyqtaý jobasyna; 151 mlrd teńge 183 densaýlyq saqtaý jobasyna; 66 mlrd teńge mańyzdy sport nysandaryna baǵyttaldy. Bul qarajat eń aldymen sýmen qamtý, densaýlyq saqtaý jáne áleýmettik ınfraqurylymda óńirlerde qarqyndy áleýmettik áserdi qamtamasyz etýde, - dedi mınıstr.

Onyń aıtýynsha, satyp alý reformasy 824 mlrd teńgeni únemdeýge jáne qaıta bólýge, sondaı-aq rásimderdi 3–6 ese jedeldetýge múmkindik berip, bıýdjet qarajatyn paıdalaný tıimdiligin arttyrdy. Sondaı-aq jasalǵan sharttardyń kólemi de 2 esege artty. Otandyq óndirýshilerden satyp alýlar 1,5 esege kóbeıdi, shaǵymdar sany 25 paıyzǵa qysqardy. 

- Memlekettik aýdıt júıesi buzýshylyqtardyń aldyn alýyn kúsheıtip, 396 mlrd teńge tıimsiz shyǵystarǵa jol bermedi. Bıýdjetti onlaın-monıtorıngteý alaıaqtyq shemalardyń jolyn kesip, shamamen 1 mlrd teńge qaıtaryldy, - dedi ol.

Mınıstr «Qarjy ortalyǵy» aktsıonerlik qoǵamynyń qyzmetin transformatsııalaý barysyna da toqtaldy.

«Bilimge» bilim berýdi qarjylandyrý biryńǵaı portaly iske qosyldy. Jeke menshik mektepterdi akkredıtteý qujattary men ótinimnen bastap jeke menshik mektepterge, aqy tóleýge deıin búkil qarjylandyrý protsesi tsıfrlandyryldy. Protsesterdi avtomattandyrý esebinen 765 jeke menshik mekteppen jedel sharttar jasaldy, onyń ishinde 38 mlrd teńgege 656 mektep qarjylandyryldy. Qarjylandyrý merzimderi 10-15 kúnge deıin qysqardy, - dedi Mádı Tákıev.

Buǵan deıin 11 aıda memlekettik bıýdjet kiristeri 21,9 trln teńgege jetkenin jazǵan edik.