Armıan qyzy Sıýzanna Ovsepıan: Qazaq ánderin erekshe tamsanyp tyńdaımyn

BALQASh. QazAqparat – Balqash qalasynda turatyn armıan qyzy Sıýzanna Ovsepıan qazaq tilin úırenýge oǵan qazaq halyq ánderi túrtki bolǵanyn aıtady. Memlekettik tildi jetik meńgergen boıjetken bolashaqta ózge ult ókilderine qazaq tilin úıretýdi maqsat qylyp otyr.

Sıýzanna Ovsepıan Uly aqyn Abaı Qunanbaevtyń «Kózimniń qarasy» ánin oryndaǵanda, týǵandary men dostary ony eljirep tyńdaıdy. Bul án jumyr jer betindegi ár qazaq balasyna tanys desek te, jas ónerpazdyń oryndaýynda tipten túrlenip ketedi.

Sıýzanna Ovsepıandy qazaqsha án aıtýǵa eshkim kúshtep úgittemegen. Qazaqtyń án ónerine degen qushtarlyǵy mektep qabyrǵasynda bastalǵan. Sodan qazaq mýzykasyn janyna serik etip keledi. Tipti memlekettik tildi úırenýge de osy án jetelegen eken.

«Kózimniń qarasy» ánin oryndaǵanda qazaq halqyna degen erekshe mahabbatymdy sezinemin. Qazaq ánderi áýendi, áýezdi, ásem bolyp keledi. Qazaq ánderin estip qalsam, erekshe tamsanyp tyńdaımyn», - deıdi Sıýzanna Ovsepıan.

Sıýzanna úshin poezııa - uly álem, tylsym kúsh. Ol qazaqtyń bas aqynynyń shyǵarmalarynan tárbıe alyp, taǵylym teretinin jetkizdi.

«Qazaq tilin úırený sonshalyqty qıyn emes. Eger ortań qazaqy bolsa, tipten ońaı. Qazaq tilin jetik meńgerýdiń artyqshylyqtaryna toqtalar bolsam, birinshi kezekte dostarymnyń qatary artyp keledi. Olarmen erkin qazaq tilinde sóılesip, bárin túsinemin. Óz-ózimdi damytýǵa da septigin tıgizýde», - dep bólisti boıjetken.

Sıýzanna Ovsepıan Álıhan Mýsın atyndaǵy Balqash gýmanıtarlyq-tehnıkalyq kolledjiniń 2-kýrs stýdenti. Bolashaq mamandyǵy — bastaýysh synyp muǵalimi. Sonymen qatar qazaq tilin meńgergisi keletin ózge ult ókilderiniń balalaryn oqytady.