Armrestlıngten álem chempıonatynda jeńiske jetken OQO sportshylary marapattaldy
ShYMKENT. QazAqparat - Armrestlıngten álem chempıonatynda jeńiske jetken ońtústikqazaqstandyq sportshylar marapattaldy. Shardara aýdanynyń ákimi Bolatbek Qystaýov jeńimpazdardy qabyldap, «Alǵys hattar» tabystady, dep habarlaıdy QazAqparat HAA tilshisi.
Shardaralyq sportshylar Vengrııada ótken álem chempıonatynda Qazaqstan quramasynyń sapynda óner kórsetip, qorjynǵa 5 altyn, 3 kúmis, 3 qola medal salyp qaıtty. Aýylǵa úlken abyroımen oralǵan sportshylardy aýdan basshysy jeńisterimen quttyqtady.
«Senderdiń árbir jeńisterińe munda otyryp bizder aıryqsha qýanyp otyrdyq. Qaısarlyq pen erekshe namys-jigerdiń arqasynda Qazaqstandy álemge tanytyp keldińder. Jeńisterińe qutty bolsyn aıtamyn», - dedi Bolatbek Dúısenbekuly.
Aýdan basshysy dúbirli dodada altynnan alqa taǵynyp, álemniń úsh dúrkin chempıony bolǵan, sonymen qatar aýdanda tuńǵysh márte «Qazaqstanǵa eńbegi sińgen sport sheberi» ataǵyna beriletin mindettemeni oryndap kelip otyrǵan Nurdáýlet Aıdarhanǵa qutty bolsyn aıta otyryp, aqshalaı syılyq tapsyrdy. Dál osyndaı syı-syıapattar álem chempıondary Erdáýlet Sarybaı, Nurhan Qadyr, Dáýren Ábsattar, Talǵatbek Rústembek, álem chempıonatynyń kúmis júldegerleri Quralaı Abdýlla men Lázzat Málikaıdar, álem chempıonatynyń qola júldegerleri Nurdáýlet Qadyr, Maǵjan Shámıev jáne Medet Orazbekov esimdi sportshylarǵa da tabys etildi.
Óz kezeginde aýdan basshysyna alǵysyn jetkizgen aýdandyq Atletızmnen balalar men jasóspirimder sport mektebiniń dırektory Nurjan Tórequlov qol kúresshiler atynan Býdapesht qalasynda ótken álem chempıonatynda Qazaqstan quramasyna jalpykomandalyq esepte ІІ oryndy jeńip alǵany úshin berilgen Kýbokty aýdan basshysyna syıǵa tartty.
