Armrestlıng: El chempıonatynda OQO sportshylary barlyq salmaqta jeńimpaz atandy
ShYMKENT. QazAqparat - Armrestlıngten ótken Qazaqstan chempıonatynda OQO sportshylary barlyq salmaqta jeńimpaz atandy. Sporttyń osy túrinen dúnıejúzi boıynsha tanymal bolǵan Shardara aýdanynyń qol kúreskerleri 11 altyndy jeńip aldy, dep habarlaıdy QazAqparat tilshisi.
Pavlodar oblysynyń Aqsý qalasynda ótken armrestlıngten eresekter arasyndaǵy Qazaqstan chempıonatyna elimizdiń birneshe oblysynan sportshylar qatysqan bolatyn. Baıraqty básekede Ońtústik Qazaqstan oblysynyń komandasyn quraıtyn Shardaranyń sportshylary óte joǵary deńgeıde óner kórsetip, chempıondyq tuǵyrǵa kóterildi. Atap aıtsaq, 55 keli salmaqta buǵan deıin álem chempıony ataǵyn jeńip alǵan Dáýren Ábsattar qarsylastaryn aıqyn basymdyqpen jeńip shyǵyp, el chempıony atandy. Dáýrenniń jeńisi jerlesterine aq jol ashyp bergendeı boldy. Azııa chempıony ataǵynyń ıegeri Qydyr Óserbaı 60 keli salmaqta synǵa túsip, bas báıgeni enshiledi. Budan keıingi jeńisti joldy 65 keli salmaqtaǵy Talǵatbek Rústembek odan ári jalǵastyryp, chempıondyq tuǵyrǵa kóterildi. 70 keli salmaqta Erjan Ábildaǵa da shaq keler qarsylas tabylmady. Sol sııaqty 75 keli salmaqta Talǵat Aqtaev ta qarsylastaryn taza jeńip shyqty. Qalǵan 80 keli salmaqta Maǵjan Shámıev, 85 keli salmaqta Ǵalymjan Qarsybaev, 90 keli salmaqta Nurdáýlet Sádýaqasov, 100 keli salmaqta Qydyrǵalı Ońǵarbaev, 110 keli salmaqta Rysdáýlet Muhanbetov, 110 keliden joǵary salmaqta Medet Quttymuratovtar Qazaqstan Respýblıkasynyń chempıondary atandy.
Al, qyzdar arasyndaǵy ótken saıysta 60 keli salmaqta synǵa túsken álemniń eki dúrkin chempıony Jazıra Aqbaeva qarsylastaryn oısyrata jeńip, chempıondyq ataqty qanjyǵaǵa baılady. Bul sportshylardyń barlyǵy da buǵan deıin álem chempıonaty men álem kýbogynyń jeńimpazdary atanǵan sport sańlaqtary. Desek te, respýblıkalyq chempıonatta barlyq salmaqtaǵy birinshi oryndy túgeldeı enshileý buryn-sońdy bolmaǵan ońdy jańalyq bolyp tur.
