Armııashylardyń ortalyq sport klýbyna qarasty tennıs korttary kúrdeli jóndeýden ótedi
ALMATY. 11 sáýir. QazAqparat /Erbol Azanbek/ - Almatydaǵy Armııashylardyń ortalyq sport klýbyna(AOSK) qarasty 3 jabyq tennıs korty kúrdeli jóndeýden ótkiziledi. Jóndeý jumystary «GSM Kcell Qazaqstan» kompanııasynyń demeýshiligimen júzege asady.
Bul búgin Almatyda uıaly baılanys operatory men «Tennıs federatsııasy» arasynda arnaıy kelisimge qol qoıý rásiminde belgili boldy.
«Biz bıznestegi áleýmettik jaýapkershiligi joǵary kompanııa retinde barlyq salalardaǵy jobalardy qoldap júrmiz. Buǵan deıin de sporttyń birneshe salasyn qoldap keldik. Endi tennıs sportynyń damýyna qol ushyn bermekpiz. Bizdiń ortaq is-áreketemizdiń nátıjesinde tennıs barlyq sanattaǵy adamdar úshin qoljetimdi bolady dep oılaımyn», - dedi «GSM Qazaqstan/Kcell» kompanııasynyń korporatıvtik baılanystar jónindegi dırektory Aıda Dosaeva.
Qazaqstannyń Tennıs federatsııasynyń vıtse-prezıdenti Ádil Bórlibaevtyń aıtýynsha, «GSM Kcell Qazaqstan» kompanııasynyń demeýshiligimen jóndeletin 4 tennıs korty ózara kelisimshartqa baılanysty Qorǵanys mınıstrliginen Tennıs federatsııasynyń basqarýyna beriledi. «Bunymen qatar aldaǵy ýaqytta Federatsııa tarapynan AOSK aýmaǵynda ornalasqan 9 ashyq kort jóndeýden ótkiziledi»,-dedi Á.Bórlibaev. Onyń aıtýynsha, korttardy jóndeý eń aldymen balalar tennısin damytýǵa baılanysty jasalyp otyr. «Jóndeýden ótken soń bul korttarda jyldyń kez-kelgen ýaqytynda jattyǵý jasap, qazaqstandyq jáne ITF týrnırlerin ótkizýge múmkindik týady», -dedi Á.Bórlibaev.
