Armııanyń Ortalyq sport klýby sporttyq jyl qorytyndysyn shyǵardy
ASTANA. 14 jeltoqsan. QazAqparat - Astanada Armııanyń Ortalyq sport klýby jyl qorytyndysyn shyǵardy. Áskerılerdiń paıymdaýynsha, 2012 jyl olar úshin medalder men jetistikterge toly jyl boldy. Jyl boıy klýb sportshylary 97 halyqaralyq, 98 respýblıkalyq deńgeıdegi 195 sporttyq is-sharaǵa qatysyp, 678 ret jeńimpaz-chempıon atandy, dep habarlaıdy elordanyń resmı saıty.
Áskerıler Ońtústik Koreıadaǵy (Pıang-Chang qalasy) bıatlonnan Azııa chempıonatyn jemisti bastady. Munda qatardaǵy jaýyngerler Galına Okolzdaeva men Anna Kıstanova jáne efreıtor Nıkolaı Braıchenko 7,5 km júgirýden 1-shi oryn alsa, aralas estafetada 10 shaqyrymǵa júgirýden 2-shi oryndy, al, negizgi armııalyq sportshylar arasynda da 2-shi oryndy mise tutty.
Ǵ. Jarylǵapovty eske alýǵa arnalǵan bokstan halyqaralyq dástúrli týrnırde de armııalyqtar QR Ulttyq quramasyna jol berip, komandalyq esepte ekinshi orynǵa shyqty. Keńes Odaǵynyń Batyry, Halyq qaharmany, armııa generaly S.Nurmaǵanbetov júldesi úshin bolǵan bokstan XVII halyqaralyq týrnırde de sol quramda qurmetti 1-shi orynǵa qol jetkizdi.
London Olımpıadasyna bizdiń eldiń Ulttyq quramasy sapyna 10 sport túrinen óner kórsetken 27 armııalyq sportshy engen bolatyn. Olar: jeńil atletıka, eskek esý jáne kanoe, sınhrondy júzý, dzıýdo, boks, júzý, aýyr atletıka, zamanaýı bessaıys, erkin jáne áıelder kúresi sporttary. QR QM TsSKA ókili, kapıtan Olga Rypakova Kolýmbııa men Ýkraınadan kelgen óziniń burynǵy qarsylastaryn basyp ozyp, úsh qarpyp sekirýden (14, 98 metr) keremet nátıje kórsetti. Kapıtan Serik Sapıev fınaldyq básekede brıtandyq sprotshyny tize búktirip, Olımpıadanyń eń úzdik boksshysyna beriletin Vel Barker Kýbogyn jeńip aldy.
Armııalyq sportshylardyń keremet óner kórsetýleri QR Ulttyq quramasy qorjynyna eki altyn alyp berdi. Bul bizdiń jalpykomandalyq esepte 12-shi orynǵa kóterilýimizge múmkindik jasady.
