Armııanyń qýaty áskerdiń sanymen emes sapasymen ólshenedi - general-maıor Erjan Isaqulov
ALMATY. 8 mamyr. QazAqparat - Qazaqstan áskeri qarýlaný turǵysynan ǵana emes, jaýyngerlik daıyndyǵy jaǵynan da joǵary deńgeıge kóterilýde.
Bul pikirin Otan qorǵaýshy kúni merekesinde Jambyl oblysyndaǵy "Otar" 40-shy áskerı bazasynda ótken jaýyngerlik parad barysynda 14776-áskerı bólim komandıriniń orynbasary general-maıor Erjan Isaqulov bildirdi.
"Jaýyngerlik parad eń aldymen, elimizdiń áskerı shebiniń qanshalyqty berik ekendigin kórsetedi. Áskerimizdiń qarýlaný deńgeıi halqymyzdyń óz qaýipsizdigine senimdi bolýǵa múmkindik beredi. Armııanyń qýaty áskerdiń sanymen emes sapasymen ólshenedi. Bul úshin eń aldymen, qarý-jaraq qazirgi zamanǵa saı bolýy kerek. Odan keıin, jaýyngerlik daıyndyq joǵary bolýy qajet", - deıdi general-maıor.
Onyń aıtýynsha, qazir Qazaqstannyń Qarýly Kúshteri áskerleriniń qýaty men bedeli óte joǵary deńgeıde. Oǵan jumsalatyn qarjy eldiń ishki jalpy óniminiń 1 paıyzynan asady. Bul áskerı qyzmetkerlerdiń áleýmettik-turmystyq jaǵdaıyn ońaltyp, olardyń baspanamen qamtamasyz etilýin jaqsartýǵa jol ashyp otyr.
