Armııany zamanǵa saı jaraqtandyrý úshin zańǵa túzetýler engizý qajet - Nazarbaeva
Kóshpeli otyrys barysynda Áskerı doktrınany, sondaı-aq QR Qarýly Kúshteriniń, ózge áskerler men áskerı qurylymdardyń qurylysy men olardy damytý tujyrymdamasyn júzege asyrý máseleleri talqylandy.
Sharaǵa Senat depýtattary, Qorǵanys mınıstrliginiń, Ulttyq qaýipsizdik komıteti Shekara qyzmetiniń, ІІM Ulttyq ulanynyń basshylyǵy qatysty.
D.Nazarbaeva eldiń qorǵanys qabiletin jáne qaýipsizdigin qamtamasyz etý máseleleriniń mańyzdylyǵyn atap ótti.
«Qarýly kúshter elimiz halqy táýelsizdiginiń kepili bolyp tabylady», - dedi senator syrtqy qaýipterdiń aldyn alý jáne joıýda armııanyń artyp otyrǵan rólin aıta kele.
Otyrysta Qarýly Kúshteri Bas shtaby bastyǵynyń birinshi orynbasary general-maıor Rýslan Shpekbaevtyń Áskerı doktrınaǵa qatysty baıandamasy tyńdaldy. Ol doktrınaǵa alǵash ret - kúrestiń «gıbrıdti» ádisteri, «áskerı emes quraldar», «ishki qarýly qaqtyǵys» uǵymdary men anyqtamalary engizilgenin jetkizdi. Sonymen qatar qujatta QR Qarýly Kúshterin, ózge áskerler men áskerı quralymdardy qoldanýdyń tártibi naqtylanǵan. Budan ózge kıber qaýipsizdik sharalaryn kúsheıtý, jalpy áskerı qaýipsizdikti qamtamasyz etý júıesine aýmaqtyq qorǵanysty ıntegratsııalaý, materıaldyq-tehnıkalyq qamtamasyz etý júıesin damytý, Qazaqstannyń beıbitshilikti qoldaý sharalaryna qatysýyn keńeıtý, memlekettiń áskerı uıymdardy basqarý júıesin damytý tártibi naqty kórsetilgen.
«Bizdiń birlesken jan-jaqty jumysymyz armııany qajetti, zamanaýı qarý-jaraqpen jáne áskerı tehnıkamen jaqyn arada jabdyqtaý máselelerin sheshýge múmkindik beredi. Ol úshin Qorǵanys týraly zańǵa tıisti túzetýler engizý qajet jáne bul múddeli memlekettik organdarmen jumys jasaýdy talap etedi», - dep atap ótti Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva.
