Armııadaǵy bir kún: 15 myńnan asa adam áskerı tirshilikpen tanysty
ASTANA. KAZINFORM — Qarýly kúshterde biryńǵaı Ashyq esik kúni ótti. Onyń aıasynda elimizdiń ár óńirindegi 50-den astam áskerı bólim kelýshilerge esigin ashty, dep habarlaıdy Qorǵanys mınıstrliginiń baspasóz qyzmeti.
Іs-sharaǵa 15 myńnan astam adam qatysty. Olardyń qatarynda mektep oqýshylary, stýdentter, pedagogter, sondaı-aq merzimdi áskerı qyzmetshilerdiń ata-analary men jaqyndary bar.
Aktsııa Qarýly kúshterdiń barlyq túri men ásker tekterin qamtydy: Qurlyq áskerleri, Áýe qorǵanysy kúshteri, Áskerı-teńiz kúshteri, Desanttyq-shabýyldaý áskerleri jáne Arnaıy operatsııalar kúshteri. Qonaqtar armııa tynys-tirshiligin ishinen kórip, áskerı qyzmet týraly jan-jaqty túsinik aldy.
Іs-shara aıasynda kelýshiler kazarmalardy, ashanalardy jáne turmystyq nysandardy aralady. Olar áskerı qyzmetshilerdiń turmys jaǵdaıymen jáne kúndelikti qyzmettiń uıymdastyrylýymen tanysty.
— Biz áskerı qyzmettiń ótý barysyn barynsha ashyq kórsetemiz. Bul jastar úshin de, ata-analar úshin de mańyzdy. Armııa — minez, tártip pen jaýapkershilik qalyptasatyn ómir mektebi, — dedi Tárbıe jáne ıdeologııalyq jumystar departamentiniń bastyǵy ádilet polkovnıgi Tileýhan Basqojaev.
Baǵdarlamanyń praktıkalyq bóligi erekshe qyzyǵýshylyq týdyrdy. Mektep oqýshylary men stýdentter áskerı qyzmetshilerdiń jattyǵýlaryn tamashalap, áskerı tehnıkamen jáne túrli bólimshelerdiń jumysymen tanysty. Sonymen qatar olar ózderin bolashaq Otan qorǵaýshysy retinde synap kórdi.
Elordadaǵy № 13 mekteptiń 9-synyp oqýshysy Daıana Gýlıaeva alǵan áserimen bólisti.
— Buǵan deıin mundaı tehnıkany tek fılmder men jańalyqtardan kóretinbiz. Búgin ony óz kózimizben kórip, tipti qolmen ustaýǵa múmkindik aldyq. Ásirese zamanaýı drondar men brondy tehnıka erekshe áser qaldyrdy. Bul — armııamyzǵa degen maqtanysh sezimin oıatatyn mańyzdy sát, — dedi ol.
Baǵdarlama saptyq alańdaǵy kórneki qoıylymdarmen aıaqtaldy. Áskerı qyzmetshiler saptyq daıyndyq elementterin, qoıan-qoltyq urys tásilderin jáne taktıkalyq is-qımyl epızodtaryn kórsetti.
Іs-shara sońynda qonaqtarǵa sarbaz botqasy usynyldy.
Ashyq esik kúnin turaqty túrde ótkizý qoǵamnyń armııaǵa degen senimin nyǵaıtyp, jastardyń áskerı qyzmetke qyzyǵýshylyǵyn arttyrýǵa jáne onyń bedelin kóterýge yqpal etedi.
Osydan buryn Gvardeısk garnızonynda 600 sarbaz áskerı-eseptik mamandyqty meńgergenin jazdyq.
