Áskerıler týnnelde qalyp qoıǵan úndi jumysshylaryn qutqarýda

AQSh-tan jetkizilgen alyp burǵylaý qurylǵysy isten shyqqan soń týnnel úıindileri astynda qalyp qoıǵan úndilik jumysshylardy qutqarý úshin áskerı ınjenerlerdiń kómegi qajet boldy. Kazinform agenttigi bul týraly DW-ge silteme jasap habarlaıdy.

Úndistannyń Ýttarakhand shtatynda 15 kúnnen beri opyrylǵan týnnel astynda qalǵan 40-tan astam jumysshyny qutqarý operatsııasyna armııa qosyldy.

NDTV telearnasynyń jeksenbi, 26 qarashada habarlaýynsha, 24 qarashada AQSh-tan jetkizilgen alyp burǵylaý qurylǵysy isten shyqqannan keıin áskerıler kómegine júginýge týra keldi.

Qutqarýshylar burǵylaý qurylǵysynyń kómegimen zardap shekkenderge jetý úshin uzyndyǵy 60 metr shuńqyr qazbaq bolǵan. Bul nysanaǵa deıin qalǵan 10 metrdi endi áskerı ınjenerler qolmen burǵylaıdy. Baqylaýshylardyń shamalaýynsha, jumysshylar úıindiler astynan endi Rojdestvo merekesinen erte shyǵarylmaıdy.

«Bul operatsııa uzaq ýaqytqa sozylýy múmkin. Taýda jumys istegende barlyǵyn boljaý múmkin emes. Biz merzimdi eshqashan aıtqan emespiz», — dep túsindirdi Tabıǵı apattarmen kúres ulttyq basqarmasynyń ókili Saıed Ata Hasnaın.

Qutqarýshylar arnaıy burǵylaǵan uńǵyma arqyly jumysshylarmen baılanys ornatty. Sol arqyly olarǵa azyq-túlik, dári-dármek jiberilýde.

Buǵan deıin qutqarýshylar olarǵa 14 saǵatta jetýdi josparlaǵany habarlanǵan bolatyn.
Eske sala ketsek, Kazinform agenttigi buǵan deıin Úndistanda 40 jumysshy qulaǵan týnnel astynda qalyp qoıǵany týraly jazǵan bolatyn. 

Keıin opyrylyp túsken týnneldiń ishindegi 41 jumysshyǵa jetý úshin qutqarýshylar úıindiniń jartysyna jýyǵyn burǵylaǵany týraly habarlandy.