Armııa sportshysy Qazaqstannyń 50 dúrkin chempıony atandy

ASTANA. QazAqparat - QR Qorǵanys mınıstrligi Armııa ortalyq sport klýbynyń sportshysy kishi serjant Vıtalıı Dıdenko gir sportynan Qazaqstannyń kýbogy, chempıonattary men birinshilikteriniń 50 dúrkin chempıony atandy. Bul týraly QR Qorǵanys mınıstrliginiń baspasóz qyzmetinen habarlady.

Joǵary ataqqa áskerı qyzmetshi jaqynda ǵana Kókshetaýda óz máresine jetken gir ekisaıysynan Qazaqstannyń kýbogynda jeńiske jetýiniń arqasynda  qol jetkizdi. 90 keliden joǵary salmaqta Vıtalıı Dıdenko gir tasyn 119 ret oqys serpip, 164 márte julqı kóterip, altyn medaldi enshiledi.  

«Ár túrli deńgeıdegi saıystarda Qarýly Kúshterdiń namysyn qorǵap júrgenimdi maqtan tutamyn. Búgingi tańda gir sporty Qarýly Kúshterde qarqyndy damyp keledi. Bizde sportpen shuǵyldaný úshin barlyq jaǵdaı jasalǵan jáne áskerı qyzmetshiler dene daıarlyǵy turǵysynda jetkilikti deńgeıde daıyndalǵan», - dep Vıtalıı atap ótti. Sportshy álemniń 8 dúrkin chempıony bolyp tabylatynyn aıta ketken jón.   

Qazaqstannyń Qarýly Kúshterinde gir sporty 2000 jyldan bastap damyp keledi.  Jyl saıyn QR QK-niń chempıonattarynda áskerı qyzmetshiler normatıvter oryndaıdy. Onyń nátıjeleri boıynsha olarǵa «Qazaqstan Respýblıkasynyń sport sheberi» ataǵy beriledi. Búgingi kúni bul ataqty 30 áskerı qyzmetshi ıemdenip úlgergen.