Armııa sportshylary Dúnıejúzilik kóshpendiler oıyndarynda 5 altyn medal jeńip aldy
ASTANA. KAZINFORM – Jarystyń ekinshi kúni Qorǵanys mınıstrligi Ortalyq sport klýbynyń quramasy Qazaqstannyń qorjynyna 5 altyn, 1 kúmis medal saldy.
Qazaq kúresi, jamby atý jáne qurashtan ótken saıystarda armııa sportshylary sátti óner kórsetti.
– Dúnıejúzilik kóshpendiler oıyndarynda sporttyń bes túrinen 14 armııa sportshysy synǵa túsýde. Eki kún ishinde olar alty medal jeńip aldy. Qazir bizdiń balýandar úshin óz kúshterin tekserýge tamasha múmkindik týyp otyr. 2025 jyly Astanada qazaq kúresinen halyqaralyq áskerı sport keńesiniń (CISM) álem chempıonaty ótedi. Bul jarysqa osy uıymnyń ókilderin arnaıy shaqyrdyq. Biz úshin bul áskerı sportshylar arasynda qazaq kúresi jarysyn daıyndaý men nasıhattaýdyń mańyzdy kezeńderiniń biri, - dedi QR Qorǵanys mınıstrligi Sport komıtetiniń tóraǵasy – Ortalyq sport klýbynyń bastyǵy polkovnık Arman Ábeýov.
Jamby atýdan Azııa stılindegi jarysta QR Qarýly kúshteriniń qyzmetkeri Batyr Beksaýyt chempıon atandy. Bul sport túrinen 27 elden barlyǵy 78 sportshy baq synasqan bolatyn.
9 eldiń 64 sportshysy qatysqan aýdaryspaqta 70 kelige deıingi salmaq dárejesinde QR Qarýly kúshteriniń qyzmetshisi Almat Látipbek altyn ıelendi.
Ókildik quram qazaq kúresi jarysyna qatysý úshin quryldy. Oǵan 41 elden segiz salmaq dárejesi boıynsha 274 sportshy (erler men áıelder) ótinim berdi. Balýandar beldesýi Jaqsylyq Úshkempirov atyndaǵy jekpe-jek saraıynda ótip jatyr. Bozkilemdegi saıysta QR Qarýly kúshteriniń qyzmetshileri Bekjan Tólepov (55 kg), Jumajan Qojambekov (74 kg) jáne Baqyt Qusaqbaev (60 kg) jeńimpaz atandy.
27 eldiń 106 sportshysy baq synaıtyn qurash týrnırinde armııa balýany aǵa leıtenant Marat Baıqamurov 100 keliden astam salmaq dárejesinde kúmis medal jeńip aldy.
