«ArMI-2019»-ǵa qazaqstandyq áskerılerdiń daıyndyǵy qandaı

ALMATY. QazAqparat – QR Qarýly Kúshteri Qurlyq áskerleri bas qolbasshysynyń jaýyngerlik daıarlyq jónindegi orynbasary, general-maıor Dáýlet Ospanov «ArMI-2019» Halyqaralyq armııa oıyndaryna qazaqstandyq áskerılerdiń daıyndyǵy týraly aıtty, dep habarlaıdy QazAqparat tilshisi.

Búgin Jambyl oblysynyń «Otar» 40-áskerı bazasynda 2019 jylǵy Halyqaralyq armııa oıyndary bastaldy. Oǵan álemniń 13 memleketinen kelgen áskerıler qatysyp jatyr.

«Jarysqa 13 elden 347 qatysýshy keldi. Olardyń barlyǵy myqty. Óıtkeni olar óz elderinde irikteýden ótken. Men Iran, Sırııa, Qyrǵyzstan, Óbekstan jattyǵý alańdarynda boldym. Olardyń daıyndyq deńgeıin kórdim. Básekelestik kúshti. Biraq biz de bar kúshimizdi salyp daıyndaldyq. Biz eki kezeńnen óttik jáne bizdiń jaýyngerler 100% daıyn ekenine senimdimin. Barlyq jarystarda birinshi oryn alǵymyz keledi», - dedi Dáýlet Ospanov.

Sonymen qatar, ol jarys qatysýshylarynyń 99% tehnıkalardy qazaqstandyq tarap usynyp otyrǵanyn aıtty.

«Negizinde bul elderde dál bizdikindeı tehnıkalar bar. Mınomet, tartylys kúshi, ıaǵnı tehnıkanyń bári olarǵa tanys. Oıyn bastalar aldynda barlyǵy bir apta jattyǵý ótkizdi. Qıyndyqtar joq. Paıdalanǵannan keıin kez kelgen jabdyq tehnıkalyq qyzmet kórsetýdi qajet etedi jáne oǵan qyzmet kórsetiledi», - dedi spıker.

Dáýlet Ospanovtyń pikirinshe, «Artıllerııalyq atý sheberleri» eń keremet jarystardyń biri bolmaq.

«Munda 12 memleket qatysýda. Básekelestik qyzyqty ótpek. Bul - jyldamdyq, dáldik, kúsh jáne senimdilik. Sonymen qatar, túngi atys alǵash ret kórsetiletinin atap ótkim keledi. Bul - ońaı emes. Sebebi, arnaıy jaryqtandyrý bar. Biz bul máselelerdiń barlyǵyn eskerdik. Oǵan 8 aı daıyndaldyq. Qaýipsizdik sharalaryn saqtaı otyryp oryndaımyz», - dep qorytyndylady ol.

Aıta ketý kerek, «Otar» áskerı bazasynyń aýmaǵynda 7-15 tamyz aralyǵynda úsh konkýrs ótedi. Oǵan Ázerbaıjan, Armenııa, Belarýs, Venesýela, Zımbabve, Egıpet, Iran, Qyrǵyzstan, Reseı, Sırııa, Tájikstan, Ózbekstan jáne Qytaıdyń áskerı qyzmetshileri qatysady.

Besinshi mereıtoılyq Halyqaralyq armııa oıyndary 3 tamyzda «Patrıot» kórme saıabaǵynda (Kýbınka) jáne Alabıno polıgonynda birqatar elderdiń qorǵanys vedomstvo basshylary men bas shtabtarynyń qatysýymen saltanatty túrde ashylǵan bolatyn. Oıyndar barysynda qurlyqtaǵy, áýedegi jáne teńizdegi mashyqtar boıynsha barlyǵy 32 jarys ótedi. Oǵan álemniń 39 elinen 220 komanda qatysýda.