ArMI-2018: Qazaqstandyq áskerı aspazdar úzdikter qatarynan kórindi

ASTANA. QazAqparat - Halyqaralyq «ArMI-2018» áskerı oıyndarynda qazaqstandyq áskerı aspazdar óz sheberlikterin kórsetip, úzdikter qatarynan kórindi, dep habarlaıdy QazAqparat tilshisi.

QR Qorǵanys mınıstrligi baspasóz qyzmetiniń habarlaýynsha, qazaqstandyq komanda «Dalalyq áskerı ashana» (Polevaıa kýhnıa) konkýrsynda erkin retseptimen as daıyndaý boıynsha Reseı, Armenııa, Vetnam, Izraıl jáne Ózbekstanmen bir topta saıysqa tústi.

Jarysqa qatysýshylarǵa shekteýli kólemde azyq-túlik berildi, sol azyq-túlikterden qazaqstandyq áskerı aspazdar qýyrdaq, kespe, grek salaty jáne mors ázirledi. Ázirlengen taǵamdardyń sapasy men dámdiligine barlyq qatysýshy elderdiń ókilderinen quralǵan arnaıy komıssııa baǵa berdi.

Taǵamdar organolıptıkalyq qasıetteri boıynsha baǵalandy, ıaǵnı dámi, ıisi jáne ásemdeýine qaraı. Jarystyń nátıjesinde qazaqstandyq komanda Reseı men Izraıldi alǵa jiberip, 3-oryndy ıelendi.

Budan bólek qazaqstandyq áskerı aspazdar konkýrs komıssııasy anyqtap bergen mázirge saı nan-toqash ónimderin pisirý saıysyna qatysady.

Aıta keteıik, «ArMI-2018» halyqaralyq áskerı oıyndar jarysy aıasynda ótken aspazdar konkýrsyna Qazaqstan, Ózbekstan, Qytaı, Mońǵolııa, Reseı, Armenııa, Ázerbaıjan, Belarýs, Vetnam, Izraıl, Angola jáne Egıpet elderi qatysýda.