Armenııanyń sarapshylary Qazaqstannyń BUU QK tóraǵalyq qyzmetine baǵa berdi

ASTANA. QazAqparat - Erevan qalasynda Qazaqstan Elshisi Tımýr Orazaev Armenııanyń tanymal sarapshylar men saıasattanýshylarymen kezdesti. Otyrys kezinde elshi elimiz 2018 jyldyń basynan bergi atqarǵan halyqaralyq is-sharalardyń qorytyndylaryna toqtaldy. Sonyń ishinde, Qazaqstannyń BUU Qaýipsizdik Keńesindegi tóraǵalyǵy barysyndaǵy bastamalary týraly áńgime qozǵaldy.

Bul týraly QR SІM baspasóz qyzmeti habarlaıdy.

Qatysýshylar memleketimizdiń qysqa merzim arasynda ózekti halyqaralyq máselelerdi sheshý kezinde mańyzdy jetistikterge jetkendigine nazar aýdardy. Máselen, Memleket basshysynyń tóraǵalyǵymen Birikken Ulttar Uıymy Qaýipsizdik Keńesiniń «Jappaı qyryp-joıatyn qarýdy taratpaý: senim sharalary» atty otyrysy men  Aýǵanstan men Ortalyq Azııa elderi Syrtqy ister mınıstrleriniń keńesi ótti; BUU Qaýipsizdik Keńesiniń tóraǵalyǵy aıasynda qazirgi tańda ártúrli memleketterde belsendi túrde talqylanyp jatqan terrorızmnen azat álemge qol jetkizý tártibi Kodeksi jobasynyń tusaýkeseri uıymdastyryldy.

Astananyń Qazaqstan kóshbasshysynyń «Álem.HHІ ǵasyr» manıfesinde baıandalǵan ıdeıasy aıasynda álemde qalyptasqan shıelenis deńgeıin tómendetý boıynsha naqty qadamdar jasaý týraly usynysy zor qyzyǵýshyyq týdyrdy. 

Jetekshi armıan sarapshysy Aram Safarıan óz sózinde Qazaqstan óziniń tóraǵalyǵy barysynda búkil álemdik qoǵamdastyqqa senim sharalary arqyly jappaı qyryp-joıý qarýyn taratpaýdyń ózekti máselelerine nazar aýdaryp, BUU QQ jumysynyń kún tártibine Ortalyq Azııa men Aýǵanstan boıynsha mınıstrler deńgeıindegi pikirtalasty qamtıtyn baǵdarlamasyn usynǵanyn atap ótti.

Saıasattanýshy Stepan Grıgorıannyń pikirinshe, BUU Qaýipsizdik Keńesindegi tóraǵalyq qyzmetin atqarǵan kezińde Astana ózin «jahandyq qaýipsizdikke qatysty kezdesýler men kelissózder ótetin» halyqaralyq alań retinde kórsetken.

«Alternatıva» zertteý ortalyǵynyń basshysy Tatýl Manaserıan óz sózinde jahandyq jáne óńirlik yntymaqtastyqty nyǵaıtýǵa baǵyttalǵan Astananyń halyqaralyq bastamalaryna joǵary baǵa bere otyra, Prezıdent Nursultan Nazarbaev usynǵan senim sharalary ózekti álemdik máselelerdi sheshýge jáne qaqtyǵystardy boldyrmaý baǵytynda mańyzdy ról atqaryp turǵanyna kóńilin aýdardy.

Sarapshy Gagık Arýtıýnıan Qazaqstandy Ortalyq Azııa memleketterin biriktirý úrdisinde aldyńǵy oryn alyp kele jatqandyǵyn atap ketti.

Buǵan qosa, kezdesý barysynda qatysýshylar BUU Qaýipsizdik Keńesiniń kún tártibine sebep bolǵan UKShU jáne EAEO-ǵa múshe memleketter úshin qazirgi zamannyń negizgi syn-tegeýrinderin jáne Memleket basshysynyń qańtardaǵy Joldaýynda belgilengen mindetterdi talqyǵa saldy.