Armenııanyń Ehegnadzor qalasynda Qazaqstannyń qurmetti konsýldyǵy ashyldy
Vaıots Dzorsk oblysynyń ákimshilik ortalyǵy - Ehegnadzor qalasynda Vaıots Dzorsk jáne Kotaıksk oblystaryndaǵy (Parýıra Sevak k., 4/04) Qazaqstannyń qurmetti konsýldyǵy ashyldy. Ashylý rásimine Qazaqstannyń Armenııadaǵy Elshisi Tımýr Orazaev, qurmetti konsýl Aram Abraamıan, oblys ákimshiliginiń, sondaı-aq ortalyq basqarý organdarynyń ókilderi qatysty.
Qurmetti konsýldyq Qazaqstan men Armenııa arasyndaǵy mádenı-gýmanıtarlyq yntymaqtastyqty, eki eldiń bıznes qoǵamdastyq ókilderiniń arasyndaǵy yntymaqtastyqty tereńdetýge yqpal etýge basa nazar aýdaratyn bolady.
«Qurmetti konsýldyqtyń qyzmetine, birinshi kezekte, Armenııada júrgen Qazaqstan azamattaryna ǵana emes, sonymen birge Armenııa azamattaryna da konsýldyq-quqyqtyq kómek kórsetý jatady. Olar bıznes jáne mádenıet salalarynda kez kelgen aqparatty, sondaı-aq qazirgi Qazaqstan týraly jańa bilim ala alady. Budan bólek, qurmetti konsýldyq bizdiń elderimiz arasyndaǵy mádenı-gýmanıtarlyq jáne ekonomıkalyq baılanystardy damytýǵa yqpal etetin bolady», - dep atap ótti ashylý rásiminde Elshi T.Orazaev.
Onyń aıtýynsha, ekijaqty yntymaqtastyqtyń kún tártibindegi basty másele - saýda qatynastaryn damytý bolyp qala beredi. Elshi qurmetti konsýldyqtyń ornalasqan jeriniń kezdeısoqtyq emestigin atap ótti. Vaıots Dzorsk jáne Kotaıksk oblystary - Armenııanyń qýatty óndiristik jáne ónerkásiptik áleýeti bar aımaqtary, olardyń geografııalyq ornalasýy da qolaıly.
«Bizdiń basty mindetimiz - Armenııadaǵy Qazaqstannyń elshiliginiń saıasatyn baýyrlas halyqtar arasyndaǵy ekijaqty qatynastardyń damýyna jańa serpin bere otyryp, jalǵastyrý. Biz logıstıkalyq máselelerdi ońtaılandyramyz jáne Armenııa óńirlerine Qazaqstan mádenıetin tanystyrýdy kózdep otyrmyz», - dep atap ótti qurmetti konsýl Aram Abraamıan.
