Armenııanyń Konstıtýtsııalyq soty parlament saılaýynyń qorytyndysyn kúshinde qaldyrdy
ASTANA. KAZINFORM – Armenııanyń Konstıtýtsııalyq soty Ortalyq saılaý komıssııasy bekitken parlament saılaýynyń qorytyndysyn kúshinde qaldyrdy. Bul týraly DW jazdy.
Armenııanyń Konstıtýtsııalyq soty 7 maýsymda ótken parlament saılaýynyń Ortalyq saılaý komıssııasy 14 maýsymda jarııalaǵan nátıjelerin kúshinde qaldyrdy. Tıisti sheshim 4 shilde, senbi kúni jarııalandy.
Baspasózge arnalǵan málimdemede sot Armenııa OSK-nyń eldiń Ulttyq jınalysyna, ıaǵnı parlamentine ótken saılaý nátıjeleri kórsetilgen sheshimin ózgerissiz qaldyrýǵa qaýly etkeni aıtylǵan.
– Bul sheshim túpkilikti bolyp sanalady jáne jarııalanǵan sátten bastap kúshine enedi, – delingen habarlamada.
Saılaý nátıjelerin jaramsyz dep taný týraly talap-aryzdardy 19 maýsymda jeti saıası partııa bergen. Olardyń qatarynda Reseılik mıllıarder Samvel Karapetıannyń oppozıtsııalyq «Kúshti Armenııa» blogy, burynǵy prezıdent Robert Kocharıannyń «Armenııa» blogy jáne eldegi eń baı adamdardyń biri Gagık Tsarýkıannyń «Gúldengen Armenııa» partııasy bar.
Konstıtýtsııalyq sot barlyq ótinishti bir óndiriske biriktirip, ony qaraýdy 26 maýsymda bastaǵan. Zań boıynsha parlament saılaýynyń qorytyndysyn joıý týraly talap boıynsha Konstıtýtsııalyq sot 15 kún ishinde sheshim qabyldaýy tıis.
Armenııadaǵy parlament saılaýynyń túpkilikti qorytyndysyna sáıkes, el parlamentine tek úsh saıası kúsh ótti. Olar – 2018 jyldyń kókteminen beri bılikte otyrǵan premer-mınıstr Nıkol Pashınıannyń «Azamattyq kelisim» partııasy, sondaı-aq proreseılik «Kúshti Armenııa» jáne «Armenııa» bloktary.
Ortalyq saılaý komıssııasynyń málimetinshe, «Azamattyq kelisim» partııasyna saılaýshylardyń 49,75 paıyzy daýys bergen. Bul partııaǵa 64 mandat alýǵa múmkindik berdi. «Kúshti Armenııa» 23,27 paıyz daýys jınap, 29 mandatqa ıe boldy. Al «Armenııa» blogy 9,92 paıyz daýys alyp, 12 mandat ıelendi.
Osylaısha, eýroıntegratsııa baǵytyn ustanatyn Pashınıan partııasy jańa úkimetti jeke ózi qurýǵa múmkindik aldy.
Al «Gúldengen Armenııa» partııasyna parlamentke ótý úshin qajet 4 paıyzdyq mejeden asýǵa nebári 0,0107 paıyz daýys jetpeı qaldy.
Eske sala keteıik, buǵan deıin Armenııadaǵy saılaýda Pashınıan óz partııasynyń jeńiske jetkenin málimdegenin jazdyq.
Al Qasym-Jomart Toqaev Nıkol Pashınıandy saılaýdaǵy jeńisimen quttyqtady.
