Armenııanyń Armavır oblysynda Qazaqstannyń Qurmetti konsýldyǵy ashyldy
ASTANA. KAZINFORM — Armenııanyń Armavır oblysynda Qazaqstannyń Qurmetti konsýldyǵy ashyldy, dep habarlaıdy Kazinform agenttiginiń menshikti tilshisi.
Ashylý saltanatyna Qazaqstan Respýblıkasynyń Armenııadaǵy elshisi Bolat Imanbaev, QR Syrtqy ister mınıstrligi apparatynyń basshysy Amangeldi Saınov, oblystyq ákimdik pen Armenııanyń syrtqy saıası vedomstvosynyń ókilderi qatysty.
Qazaqstan Respýblıkasynyń Armavır oblysyndaǵy Qurmetti konsýly bolyp Garnık Kazarıan taǵaıyndaldy. Konsýldyqtyń negizgi mindetteri — Armenııa aýmaǵynda júrgen Qazaqstan azamattaryna konsýldyq-quqyqtyq jáne zańgerlik kómek kórsetý, kásipkerlik qyzmet salasynda aqparat berý, sondaı-aq eki el arasyndaǵy mádenı-gýmanıtarlyq jáne ekonomıkalyq baılanystardyń damýyna járdemdesý.
Qazaqstannyń Armenııadaǵy elshisi Bolat Imanbaevtyń aıtýynsha, Armavır oblysynda QR Qurmetti konsýldyǵynyń ashylýy eki eldiń óńiraralyq yntymaqtastyqty damytýǵa jáne praktıkalyq ózara is-qımyldy keńeıtýge degen ortaq umtylysyn kórsetedi.
— Qurmetti Garnık Manvelovıch, sizge joǵary ári jaýapty mıssııa júktelip otyr. Sizdiń qyzmetińiz ekijaqty saýda-ekonomıkalyq jáne ınvestıtsııalyq baılanystardy odan ári nyǵaıtýǵa, mádenı-gýmanıtarlyq yntymaqtastyqty ilgeriletýge, sondaı-aq konsýldyq okrýg aýmaǵyndaǵy Qazaqstan Respýblıkasy azamattaryna tıimdi qoldaý kórsetýge baǵyttalady dep senemiz. Qurmetti konsýldyqtyń jumysy qazaq-armıan yntymaqtastyǵyn praktıkalyq mazmunmen tolyqtyrýǵa, ózara senimdi nyǵaıtýǵa jáne memleketterimiz arasyndaǵy dostyq qatynastardy odan ári damytýǵa yqpal etedi dep kámil senemiz, — dedi Qazaqstan elshisi Bolat Imanbaev ashylý rásiminde.
Buǵan deıin Qazaqstannyń Armenııamen áýe qatynasyn keńeıtip jatqany habarlanǵan bolatyn.
