Toqaev Ázerbaıjan basshysyna sanktsııalardy alyp tastap, saýdaǵa jaǵdaı jasaǵany úshin alǵys aıtty
ASTANA. KAZINFORM – Bıyl qarashada Ázerbaıjan aýmaǵy arqyly Armenııaǵa Qazaqstan bıdaıynyń alǵashqy 1 myń tonnasy jetkizildi. Bul týraly Memleket basshysy Qasym-Jomart Toqaev Armenııa Premer-mınıstri Nıkol Pashınıanmen kelissózderden keıingi brıfıngte aıtty.
– Men Ázerbaıjan basshysyna sanktsııalardy alyp tastap, óz eli arqyly ekijaqty tikeleı saýda júrgizý týraly sheshim qabyldaǵany úshin rızashylyǵymdy bildirdim. Mysaly, bıylǵy qarasha aıynda Ázerbaıjan aýmaǵy arqyly Armenııaǵa Qazaqstan bıdaıynyń alǵashqy 1 myń tonnasy jetkizildi. Bul bastamanyń saıası jáne ekonomıkalyq mán-mańyzy aıryqsha. Biz Armenııaǵa joǵary sapaly astyq ónimderin jáne basqa da taýarlardy turaqty túrde jetkizýge daıynbyz. Osy baǵyttaǵy jumysqa kúsh-jigerimizdi jumyldyrýǵa ýaǵdalastyq. Eki el arasynda tikeleı áýe reısin ashý jáne áýemen júk tasymaldaý jumysyn retke keltirý – mańyzdy mindettiń biri, – dedi Qasym-Jomart Toqaev.
Qasym-Jomart Toqaev tsıfrlandyrý jáne jasandy ıntellekt salasyndaǵy yqpaldastyqtyń áleýeti zor ekenin de atap ótti.
– Qazaqstanda tsıfrlandyrý úderisi qarqyndy júrip jatyr. Armenııa ІT-tehnologııalar men startap ekojúıesinde aıtarlyqtaı tabysqa qol jetkizdi. Bul – eki eldiń ekonomıkasyn damytýǵa tyń serpin beretin mańyzdy sala. Osy oraıda, jasandy ıntellekt, jańa tehnologııa jáne tsıfrlandyrý boıynsha tájirıbe almasýǵa kelistik, bul baǵytta birlesken jobalardy iske asyrý máselesine toqtaldyq. Premer-mınıstr Pashınıan myrza aımaqtaǵy eń iri IT startap parki – Astana Hub jáne Alem.ai jasandy ıntellekt ortalyǵynyń jumysymen tanysady. Kelesi jyly Alem.ai negizinde Armenııanyń TUMO Astana halyqaralyq bilim berý ortalyǵy ashylady, – dedi Memleket basshysy.
Aıta keteıik, Qasym-Jomart Toqaev pen Nıkol Pashınıan kelissóz qorytyndysy boıynsha Birlesken málimdeme qabyldady.