Armenııaǵa «Eýrovıdenıege» qatysýdan bas tartqany úshin aıyppul salyndy
ASTANA. 4 mamyr. QazAqparat - Eýropalyq habar taratý odaǵy Armenııaǵa Bakýdegi «Eýrovıdenıege» qatysýdan bas tartqany úshin aıyppul saldy, dep habarlady ITAR-TASS.
Eýropalyq habar taratý odaǵynyń sheshimine sáıkes Armenııa konkýrsqa qatysýdyń tolyq jarnasyn, sondaı-aq osy somanyń jartysyn aıyppul retinde tóleýi tıis. Budan basqa, Armenııanyń qoǵamdyq teledıdary «Eýrovıdenıe» fınalyn tikeleı efırde kórsetýi qajet.
Eýropalyq habar taratý odaǵynan málim etilgendeı, Armenııa eger osy aıtylǵan usynystardan bas tartsa, 2013 jylǵy «Eýrovıdenıege» qatysýdan shettetiledi. Sonymen qatar Odaq ókilderi aıyppul Armenııanyń qatysýdan bas tartý sebepterinen tys konkýrs reglamentine sáıkes salynyp otyrǵanyn atap ótti.
Armenııa 7 naýryzda «Eýrovıdenıege» qatysýdan resmı túrde bas tartqan bolatyn. Odan buryn armıandyq oryndaýshylar eldiń qoǵamdyq teledıdary arqyly konkýrsqa baıkot jarııalaý jóninde ashyq hat jazdy. Buǵan Ázirbaıjanmen shekaralas jerde armıan sarbazynyń qaza bolýy sebep boldy, ony ázirbaıjandyq mergen atyp óltirdi degen paıymdaý jasaldy. Alaıda ony ózimen qyzmettes sarbaz atyp óltirgen bolyp shyqty.
«Eýrovıdenıe» konkýrsy 22-26 mamyr aralyǵynda Bakýde ótedi. Ázirbaıjan bul quqyqqa 2011 jyly Germanııada ótken «Eýrovıdenıede» Eldar Gasymov pen Nıgar Djamaldyń dýetiniń jeńisi arqasynda ıe boldy.
