Armenııadan jeńilgenimizge jalǵyz men kinálimin - Sergeı Malyı
ASTANA. QazAqparat - Qazaqstan ulttyq quramasynyń qorǵaýshysy Sergeı Malyı Sports.kz saıtyna Fýtboldan 2018 jylǵy Álem chempıonatynyń irikteý týrynda Armenııa quramasynan jeńilý sebebi týraly pikir bildirdi.
«Match óte aýyr boldy jáne bizdiń komanda jaqsy nátıjege qol jetkizý úshin baryn saldy. Biraq, ketken qatelikterdiń saldarynan jeńilis taptyq. Túsinemin, match nátıjesi kóptegen qazaqstandyq jankúıerlerdiń eńsesin túsirdi. Armenııadan jeńilýde jalǵyz men kinálimin dep esepteımin, basqa jigitterge tıisýdiń qajeti joq. Men sanaly, eresek adam retinde qandaı qatelik jibergenimdi túsinemin jáne aqtalyp jatqym kelmeıdi. Taǵy da aıtarym: jigitterge tıispeńizder... Barlyq ujym, bapkerler jáne oıynshylar jeńis úshin baryn saldy. Barlyq syn-eskertpelerdi maǵan aıtyńyzdar, men ony er azamat retinde qabyldaýǵa daıynmyn», - dedi Malyı.
