Armenııadan ákelingen jyrtqyshtar haıýanattar baǵyna ornalastyryldy
QARAǴANDY. KAZINFORM — Qaraǵandy zoobaǵyn úsh jolaqty gıena men eki gıenatektes ıt tolyqtyrdy. Barlyq janýar jas, qazirgi ýaqytta jańa jaǵdaıǵa beıimdelý satysyn ótip jatyr. Bul týraly Qaraǵandy oblysy ákimdiginiń baspasóz qyzmeti habarlady.
Jolaqty gıenalar 2008 jyldan beri Halyqaralyq Qyzyl kitapqa engizilgen. Bul — Afrıkadan tys jerlerde kezdesetin gıenalardyń jalǵyz túri. Qaraǵandy zoologııalyq baǵynyń kollektsııasynda jolaqty gıenalar alǵash ret paıda bolyp otyr.
Qazir munda jolaqty gıenanyń eki urǵashy men bir atalyǵy, sondaı-aq gıenatektes ıtterdiń bir atalyǵy men bir urǵashy túri bar. Janýarlar Qaraǵandyǵa Erevannan almasý baǵdarlamasy aıasynda jetkizildi. Buǵan deıin Qaraǵandy zoobaǵy Armenııa astanasyna jas jyrtqyshtardy joldaǵan.
Zoobaq dırektory Gúlnar Adambekovanyń aıtýynsha, janýarlardy berý jónindegi kelissózder shamamen bir jyl júrgizilgen.
— Bizge jolaqty gıenalar men gıenatektes ıtterdi berý týraly kelissózder shamamen bir jylǵa sozyldy. Osy ýaqyt ishinde biz olar úshin keń voler daıyndap, kútim jasaýǵa qatysty barlyq qajetti aqparatty zerdeledik. Jalpy alǵanda, olardy kútý kúrdeli emes, azyq ratsıony da ekzotıkalyq emes. Olar et, taýyq eti, tiri jem jeıdi. Biz óz jyrtqyshtarymyzdy da osyndaı azyqpen qorektendiremiz, — dedi Gúlnar Adambekova.
Janýarlar Erevannan Qaraǵandyǵa ushaqpen jetkizildi. Aýa temperatýrasynyń tómen bolýyna baılanysty jerústi tasymalynan bas tartyldy, óıtkeni gıenalar men gıenatektes ıtter jylýsúıgish.
Qazirgi ýaqytta janýarlar karantınde. Olarǵa táýlik boıy baqylaý júrgizilýde. Soǵan qaramastan, kelýshiler jańa turǵyndardy kóre alady. Alaıda kúndiz olar kóbine uıyqtaıdy, sebebi tabıǵatyna saı gıenalar men gıenatektes ıtter túngi ýaqytta belsendi.
Kóktemge deıin jyrtqyshtar jylytylatyn ǵımaratta bolady. Jyly kezeń bastalǵanda olardy qasqyrlardyń janyndaǵy ashyq volerge kóshirý josparlanyp otyr. Onda janýarlarǵa keń ári jaıly jaǵdaı jasalady.
Dırektordyń aıtýynsha, zoobaq jańa turǵyndar tolyq beıimdelip, bolashaqta urpaq ákeledi dep úmittenedi.
— Barlyq janýar jas, deni saý jáne óte belsendi. Tábetteri jaqsy. Aıta ketý kerek, qalyptasqan stereotıpterge qaramastan, gıenalar óte meıirimdi ári aqyldy. Intellekt jaǵynan olar prımattarǵa jaqyn. Gıenalar adamdardy este saqtap, ajyrata alady. Qazir olar ózderine kútim jasaıtyn kıperlerge belsendi túrde úırenip jatyr, — dep atap ótti Gúlnar Adambekova.
Jyrtqyshtar men tuıaqty janýarlar dástúrli túrde qaraǵandylyqtar arasynda erekshe tanymal. Bıyl zoobaq kollektsııany keńeıtip, jańa túr ókilderin alýdy josparlap otyr. Alaıda qandaı janýarlar keletinin ákimshilik ázirge qupııa ustap otyr.
Aıta ketelik bıyl Qazaqstanǵa Reseıden 3-4 Amýr jolbarysy jetkiziledi.