Armenııadan ákelingen kólikti senimhatpen júrgizgen azamattyń atyna nelikten tirkeýge bolmaıdy – ІІM jaýaby

NUR-SULTAN. QazAqparat – Armenııadan ákelingen kólikti senimhat nemese saqtandyrý polısimen aıdap júrgen azamattyń atyna nelikten tirkeýge bolmaıdy? QR ІІM Ákimshilik polıtsııa komıteti tóraǵasynyń orynbasary Serik Túsipov bul shekteýdiń úsh sebebin aıtyp berdi, dep habarlaıdy QazAqparat tilshisi.

«Armenııadan ákelingen kólikterdi tirkeýdi jeńildetý úshin Halyqqa qyzmet kórsetý ortalyqtary jeksenbi kúni saǵat túski birge deıin jumys isteıdi. Sol HQO arhıvterinde Armenııanyń jaýapty organdarynan berilgen tehnıkalyq qujattar men memlekettik nómirleri saqtalady», - dedi ol OKQ-da «QR azamattary Armenııadan ákelgen avtomobılderdi tirkeý týraly» taqyrybynda ótken baspasóz máslıhatynda.

Serik Túsipov sonymen birge Armenııadan ákelinetin kólikter boıynsha polıtsııaǵa jıi túsetin suraqtarǵa toqtaldy. Sonyń biri – senimhat nemese saqtandyrý polısi arqyly kólikti júrgizgen azamattardyń atyna nelikten sol kólikti tirkeýge bolmaıdy?

«Buǵan deıin aıtqanymdaı, bul kólikterdi atalmysh azamattardyń atyna tirkeýge bolmaıtyndaı birneshe shekteý bar. Birinshiden, Armenııanyń Eýrazııalyq ekonomıkalyq odaqqa ený týraly kelisimi qujatynda bizdiń el men Armenııa arasyndaǵy kedendik baj aıyrmasy tólenbeıinshe adam menshiginen mundaı kólikterdi qaıtarymsyz negizde aıyrýǵa tyıym salynǵan. Ekinshiden, bir kólik Qazaqstannyń da, Armenııanyń da tirkeýinde tura almaıdy. Úshinshiden, Armenııanyń jaýapty organdary beretin tehnıkalyq qujatta «adam menshiginen bul kólikti qaıtarymsyz negizde aıyrýǵa» shekteý qoıylǵany» týraly jazylǵan», - dedi ol.