Armenııadaǵy prezıdenttik saılaýda Sarkısıannyń jeńgeni habarlandy
ASTANA. 19 aqpan. QazAqparat - Armenııanyń ortalyq saılaý komıssııasy barlyq saılaý ýchaskelerindegi berilgen daýystardy sanap, onyń qorytyndysy boıynsha qazirgi prezıdent Serj Sarkısıannyń jeńiske jetkenin habarlady. Oǵan saılaýshylardyń 58 paıyzdan astamy daýys bergen.
Daýys berýge saılaýshylardyń 60 paıyzǵa jýyǵy qatysqan, dep habarlady «Azattyq».
Burynǵy syrtqy ister mınıstri Raffı Ovannısıange saılaýshylardyń 36,7 paıyzy daýys bergen. Biraq ol jeńilisin moıyndamaı, "bılik Sarkısıannyń jeńiske jetýi úshin daýys berý nátıjelerin burmalady",- dep málimdedi.
Resmı oryndar saılaý barysynda zań buzýshylyqtar týraly aqparattar túskenin moıyndaǵanymen, daýys berý nátıjeleri burmalandy degen aıypty joqqa shyǵardy.
EQYU, Eýropa keńesi jáne Eýropa parlamentiniń baqylaýshylary búgin saılaýǵa bergen baǵasyn jarııalaıdy.
Saılaý naýqany kezinde úmitkerlerdiń biri - Parýır Arıkıanǵa qastandyq jasalǵan edi. Taǵy bir úmitker Andrıas Gýkasıan "saılaý alaıaqtyq jolmen ótedi" dep málimdep, ashtyq jarııalaǵan bolatyn.
Armenııada prezıdent bes jyl merzimge saılanady.
