Armenııadaǵy saılaý: Pashınıan óz partııasynyń jeńiske jetkenin málimdedi
ASTANA. KAZINFORM – Armenııa premer-mınıstri Nıkol Pashınıan óz partııasynyń eldegi parlament saılaýynda jeńiske jetkenin málimdedi, dep habarlaıdy VVS.
Onyń aıtýynsha, Azamattyq kelisim partııasy úkimetti óz betinshe qurady.
Bıýlletenderdi sanaý jalǵasyp jatyr, alaıda Armenııa Ortalyq saılaý komıssııasy jarııalaǵan alǵashqy daýys berý qorytyndylary boıynsha Pashınıan partııasy senimdi túrde kósh bastap keledi.
Daýys berý jergilikti ýaqyt boıynsha saǵat 20:00-de aıaqtaldy. El boıynsha barlyq 2005 saılaý ýchaskesi jabylǵannan keıin daýystardy sanaý bastaldy. Parlamentke ótý úshin partııalar 4 paıyzdyq mejeden asýy kerek boldy. Al partııalyq bloktar men alıanstar úshin shek joǵaryraq belgilendi: úsh partııaǵa deıingi birlestikter úshin – 8 paıyz, al tórt jáne odan da kóp partııadan turatyn alıanstar úshin – 10 paıyz.
Kúndizdiń ózinde bul parlament saılaýyndaǵy saılaýshylar belsendiligi sońǵy jyldardaǵy naýqandarǵa qaraǵanda aıtarlyqtaı joǵary ekeni belgili boldy. OSK málimetinshe, jergilikti ýaqyt boıynsha saǵat 17:00-degi jaǵdaımen saılaýshylardyń 48,92 paıyzy daýys bergen. Bul kórsetkish 2018 jáne 2021 jyldardaǵy saılaýmen salystyrǵanda joǵary boldy.
Al saǵat 20:00-degi málimet boıynsha saılaýǵa qatysý deńgeıi 58,97 paıyzdy qurady. Mundaı joǵary belsendilik Armenııanyń bul saılaýǵa úlken shıelenis pen belgisizdik jaǵdaıynda kelgenin kórsetedi. Saılaý naýqany qoǵamnyń tereń jiktelýi jaǵdaıynda ótti, al parlamenttegi oryndar úshin birden 18 partııa men blok kúresti.
Saılaý aldyndaǵy saýalnamalar respondentterdiń 40 paıyzy eshbir saıasatkerge senbeıtinin kórsetken. Al taǵy 23 paıyzy daýys berý bastalǵanǵa deıin óz tańdaýyn anyqtamaǵan.
Saılaýshylar Nıkol Pashınıan úkimetiniń Batyspen jaqyndasý baǵyty men bytyrańqy oppozıtsııa usynǵan saıası balamalardyń birin tańdaýy tıis boldy.
Oppozıtsııanyń eń kózge túsken kúshteriniń qatarynda armıan tekti reseılik mıllıarder Samvel Karapetıanmen baılanysty reseıshil «Kúshti Armenııa» alıansy jáne qaýipsizdik pen Qarabaq máselesinde qatań ustanymdy jaqtaǵan burynǵy prezıdent Robert Kocharıan jetekshilik etetin «Armenııa» blogy boldy.
Osydan birneshe jyl buryn Taýly Qarabaqtaǵy baqylaýdyń joǵalýynan keıin kópshilik Pashınıannyń saıası mansaby is júzinde aıaqtaldy dep sanaǵan edi. Alaıda bul saılaý onyń qarsylastaryna saılaýshylardyń senimi odan da tómen ekenin kórsetti.
Eske sala ketsek, buǵan deıin Armenııadaǵy parlament saılaýyna saılaýshylardyń 58,97 paıyzy qatysqanyn jazdyq.
