Armenııada jer silkindi

EREVAN. QazAqparat – Armenııada búgin kúndiz magnıtýdasy 4.7 ball bolatyn jer silkinisi tirkeldi. Jer silkinisiniń kindigi Erevan qalasynan 8 km qashyqtyqta boldy, terbelis jıiligi 5-6 balǵa jetti, dep habarlaıdy QazAqparat tilshisi.

«13 aqpan kúni 15:29-da (Nur-Sultan ýaqytymen 17:20-da) Armenııada jer silkinisi boldy. Eldiń TJM málimetine saı, jer silkinisiniń oshaǵy 10 km tereńdikte bolǵan. Kindigi el astanasynan ońtústik-shyǵysqa qaraı 8 km qashyqtyqta ornalasqan, ol jerde terbelis jıiligi 5-6 balǵa jetken. Eldiń basqa óńirlerinde jer silkinisi 3-4 baldyq deńgeıde sezilgen.

Erevannyń barlyq aýdanynda álsiz, qysqa ýaqytqa sozylǵan jer silkinisi sezilgen. Astananyń ár bóliginde kópqabatty úılerdiń turǵyndary dalaǵa qashyp shyqqan, uıaly baılanys úzilgen.

Aıta keteıik, 5 aqpan kúni de Armenııanyń Gegarkýnıksk oblysynda jer silkinisi tirkeldi. Onyń oshaǵy 10 km tereńdikte boldy. Jer silkinisi kindiginde terbelis jıiligi 6-7 ball shamasynda bolǵan.