Armenııada jasandy ıntellekt fabrıkasy ashyldy
ASTANA. KAZINFORM – Armenııanyń Razdan qalasynda jasandy ıntellekt tehnologııalaryn damytýǵa arnalǵan iri esepteý ınfraqurylymy ortalyǵy – Firebird kompanııasynyń JI fabrıkasy resmı túrde ashyldy, dep habarlaıdy óńirdegi Kazinform agenttiginiń menshikti tilshisi Armenpress-ke silteme jasap.
Razdan qalasy qaýymdastyǵy basshysy Sevak Mıkaelıannyń aıtýynsha, aýqymdy ınvestıtsııalyq baǵdarlamanyń birinshi kezeńi iske qosylǵan. Jasandy ıntellekt fabrıkasyn qurý qalanyń ekonomıkalyq damýyna, ınvestıtsııalar tartýǵa jáne jumys oryndaryn qurýǵa jańa múmkindikter ashady.
– Endi Razdan ınnovatsııa men joǵary tehnologııa ortalyǵy retinde jahandyq tehnologııalyq kartada bolady, - dedi qaýymdastyq basshysy.
Firebird kompanııasynyń málimeti boıynsha, jobanyń bastapqy alańynda shamamen 15 MVt qýattylyǵy bar 6144 NVIDIA B200 grafıkalyq protsessory ornalasady. Kompanııa keshenniń esepteý qýatyn birtindep keńeıtýdi josparlap otyr.
Firebird Armenııadaǵy nysandy jahandyq jasandy ıntellekt ınfraqurylymy platformasynyń negizi retinde qarastyrady. Ony basqa damýshy naryqtarǵa keńeıtýdi josparlap otyr. NVIDIA, Dell Technologies jáne basqa da tehnologııalyq seriktester jobaǵa qatysyp jatyr.
Armenpress aqparaty boıynsha, jasandy ıntellekt zaýytynyń jalpy ınvestıtsııalyq quny 5 mıllıard dollarǵa baǵalanady. Razdandaǵy joba jeke derekter ortalyǵynyń qurylysynan asyp túsedi jáne jasandy ıntellektti damytýǵa baǵyttalǵan iri esepteý klasterin qurýdy kózdeıdi.
Buǵan deıin Qazaqstan Firebird halyqaralyq AI -ınfraqurylym jelisine kirgeni habarlanǵan bolatyn.
Firebird halyqaralyq keńeıtý isin jalǵastyrýdy jáne 2028 jyldyń sońyna qaraı óziniń jahandyq AI-ınfraqurylymynyń jıyntyq qýatyn Armenııada, Qazaqstanda jáne basqa elderde 2 GVt-qa deıin jetkizýdi josparlap otyr.
Kompanııa sonymen qatar NVIDIA-nyń Firebird-ke ınvestıtsııa salý josparlary týraly habarlady. Buryn kompanııanyń ınvestory CoreWeave boldy. Firebird málimdemesine sáıkes, tartylǵan qarajat jahandyq AI-ınfraqurylymyn jedel damytýǵa baǵyttalatyn bolady.
Mektep pánderiniń mazmuny jasandy ıntellekt baǵytynda jańartylyp jatqanyn jazǵan edik.
