Armenııada jańa Konstıtýtsııa jobasy ázirlenip jatyr

ASTANA. KAZINFORM — Armenııanyń negizgi zańyna birqatar mańyzdy ózgerister engizý josparlanyp otyr. Bul týraly eldiń ádilet mınıstri Srbýı Galıan parlamentte jýrnalısterge bergen suhbatynda málimdedi, dep habarlaıdy agenttiktiń menshikti tilshisi.

Mınıstrdiń aıtýynsha, aldaǵy parlamenttik saılaýdan keıin jeńiske jetken partııa parlamenttegi kópshilikti óz betinshe nemese koalıtsııa arqyly qalyptastyra almasa, ekinshi týr ótkizilmeıdi. Mundaı jaǵdaıda barlyq saıası kúshterdiń qatysýymen jańa saılaý taǵaıyndalady.

Tek qaıta ótken saılaýdan keıin de parlamenttik kópshilik qurylmasa, sonda ǵana ekinshi týr ótkizý qarastyrylǵan.

Srbýı Galıan atap ótkendeı, jańa Konstıtýtsııadaǵy basty jańalyqtardyń biri — parlamenttiń óz-ózin tarata alý quqyǵy. Bul úshin premer-mınıstrge senimsizdik votýmyn uzaq rásimder arqyly jarııalaý nemese onyń otstavkaǵa ketýin kútýdiń qajeti joq. Joba depýtattardyń belgili bir bóligi bastama kótergen jaǵdaıda, qajetti daýys sany jınalsa, parlamentti taratýdy kózdeıdi.

Sonymen qatar, jańa Konstıtýtsııada parlamenttik komıssııalardyń ókilettikterin keńeıtý usynylady. Atap aıtqanda, atqarýshy organdar basshylaryn taǵaıyndaý kezinde komıssııalarǵa konsýltatsııalyq qorytyndy berý quqyǵy berilmek.

Buǵan deıin Armenııa premer-mınıstri Nıkol Pashınıannyń eldegi parlament saılaýyna qatysatyny habarlandy.