Armenııada zańsyz ákelingen telefondar jumys istemeıtin bolady
ASTANA. KAZINFORM — Armenııa uıaly telefondardyń kóleńkeli naryǵymen kúresý úshin IMEI-kodtardy tirkeý júıesin engizedi, dep habarlaıdy Kazinform menshikti tilshisi.
Armenııada IMEI-kodtardy tirkeý men baqylaýdyń biryńǵaı júıesin qurý josparlanyp otyr. Bul júıe elge zańdy túrde ákelingen nemese belgilengen tártippen tirkelgen qurylǵylardy ǵana mobıldi baılanys jelilerine qosýǵa múmkindik beredi.
Tıisti sharalar qazirgi ýaqytta el bıligi qarastyryp jatqan «Elektrondyq kommýnıkatsııalar týraly» zańǵa engiziletin túzetýler jobasynda kózdelgen.
Úkimet otyrysynda sóz sóılegen Armenııanyń Premer-mınıstri Nıkol Pashınıan uıaly telefondar naryǵy kóleńkeli ekonomıkanyń eń iri segmentteriniń biri bolyp qala beretinin aıtyp, ony retteý úshin júıeli sheshimder qajet ekenin málimdedi.
— Uıaly telefondardyń qara naryǵynyń dáýiri aıaqtalýǵa jaqyn. Zańdy túrde elge ákelingeni rastalmaǵan birde-bir telefon Armenııa Respýblıkasy aýmaǵynda jumys istemeıtin bolady, — dedi Úkimet basshysy.
Premer-mınıstrdiń aıtýynsha, jańa erejeler eń aldymen naryq qatysýshylary men bıznes qaýymdastyqqa áser etedi. Al jeke paıdalanýǵa arnalǵan uıaly qurylǵylardy elge ákeletin azamattar úshin qosymsha qıyndyqtar týǵyzbaıtyn arnaıy tártip qarastyrylmaq.
Pashınıan bul bastama salalyq uıymdar men parlament depýtattarymen talqylanatynyn atap ótti. Sonymen birge ol reformany keıinge qaldyrý oıda joq ekenin jetkizdi.
— Júıe 2027 jylǵy 1 qańtardan bastap kúshine enip, tolyq jumys isteýi tıis, — dedi premer-mınıstr.
Zań jobasyna túsindirme jazbada kórsetilgendeı, IMEI-kodtardy baqylaý tetiginiń bolmaýy deklaratsııalanbaǵan, jalǵan nemese ózgertilgen sáıkestendirý nómirleri bar qurylǵylardyń aınalymyna jol ashady. Bul salyq túsimderiniń azaıýyna, básekelestik teńsizdigine, sondaı-aq tehnıkalyq jáne qaýipsizdik táýekelderiniń artýyna sebep bolady.
Úkimettiń pikirinshe, jańa júıeni engizý kóleńkeli ekonomıkanyń kólemin qysqartýǵa, salyqtyq ákimshilendirýdiń tıimdiligin arttyrýǵa, mobıldi qurylǵylar naryǵyn retteýge, tutynýshylardyń quqyqtaryn qorǵaýdy kúsheıtýge jáne telefon urlyǵy men alaıaqtyq deńgeıin tómendetýge múmkindik beredi.
Buǵan deıin Ázerbaıjan Armenııa úshin halyqaralyq ınternet-trafıktiń tranzıtin qamtamasyz etetini habarlanǵan bolatyn.
