Armenııada tıisti bilimi joq kosmetologtarǵa qatysty jaza kúsheıedi
EREVAN. KAZINFORM — Armenııanyń Densaýlyq saqtaý mınıstrligi kosmetologııalyq qyzmetterdi lıtsenzııalaý talaptaryn qatańdatyp, tıisti ruqsatsyz qyzmet kórsetkenderge salynatyn aıyppul mólsherin ulǵaıtýdy qarastyryp jatyr, dep habarlaıdy Kazinform agenttiginiń Erevandaǵy menshikti tilshisi.
Atalǵan máseleni parlament depýtaty Arýsıak Manavasıan kóterdi. Onyń aıtýynsha, kúrdeli kosmetologııalyq protsedýralardy medıtsınalyq bilimi joq, tek qysqa merzimdi kýrstardan ótken adamdar jıi jasap júr.
Osy rette Densaýlyq saqtaý mınıstri Anaıt Avanesıan mundaı zańbuzýshylyqtardyń áli de tirkelip jatqanyn rastady. Vedomstvonyń josparyna sáıkes, mamandardyń biliktiligi men olardy lıtsenzııalaý erejeleri ǵana emes, sondaı-aq medıtsınalyq qyzmet kórsetetin mekemelerge qoıylatyn talaptar da kúsheıedi.
— Mundaı qyzmetterdi tek tıisti lıtsenzııa alǵan mamandar ǵana kórsete alady. Bul qazirgi ýaqytta óte ózekti máselege aınalyp bara jatyr, — dedi mınıstr.
Sondaı-aq Anaıt Avanesıan erejeni elemeı, kosmetologııalyq qyzmet kórsetkenderge qoldanylatyn jaýapkershilikti kúsheıtý, sonyń ishinde aıyppul mólsherin arttyrý máselesi de qarastyrylatynyn jetkizdi.
Buǵan deıin Armenııada balalarǵa jynystyq zorlyq-zombylyq kórsetkenderge jaza kúsheıetinin jazǵan edik.
Qosa ketsek, 28 qazanda Armenııa parlamenti turmystyq zorlyq-zombylyqtyń aldyn alý jáne odan zardap shekken adamdardy qorǵaýǵa baǵyttalǵan zań jobasyn birinshi oqylymda qabyldady.