Armenııada syrtqy barlaý bólimshesi qurylady
ASTANA.KAZINFORM — Armenııada syrtqy barlaý bólimshesi qurylady. Beısenbi kúni Armenııa úkimeti kezekti otyrysynda «Ulttyq qaýipsizdik organdary týraly» zańǵa túzetý engizý týraly zań jobasyn maquldady, dep habarlaıdy Kazinform agenttiginiń menshikti tilshisi.
Túzetýler Ulttyq qaýipsizdik qyzmeti (UQQ) men Armenııanyń Syrtqy barlaý qyzmeti arasyndaǵy fýnktsııalardyń bólinýine baılanysty engizildi. Jańa bólimshe UQQ Bas barlaý basqarmasynyń quramynda qurylady jáne sheteldegi Armenııa dıplomatııalyq mıssııalarynyń qaýipsizdigin qamtamasyz etýge jaýapty bolady.
Zań jobasyna sáıkes, sheteldik qarsy barlaý bólimshesine memlekettik jáne jergilikti basqarý organdarynyń, sondaı-aq uıymdardyń aqparattyq júıeleri men derekqorlaryna qashyqtan kirýdi qosa alǵanda, tegin qol jetkizý múmkindigi beriledi. Qujatta UQQ qarsy barlaýy men Syrtqy barlaý qyzmeti arasyndaǵy yntymaqtastyqtyń naqty tetikterin jasaý da kózdelgen.
Túzetýler vedomstvonyń kadr saıasatyna da áser etedi. Atap aıtqanda, 30 jastan asqan Armenııa Respýblıkasynyń azamattaryn UQQ shekara áskerlerinde, arnaıy kúshterinde jáne arnaıy kásibı bilimdi qajet etetin basqa da organdarda qyzmet etýge shaqyrýǵa ruqsat berý usynylady.
Esterińizge sala keteıik, Armenııanyń Syrtqy barlaý qyzmeti 2022 jyldyń jeltoqsanynda UQQ-dan bólinip, ony Krıstıne Grıgorıan basqarady.
Buǵan deıin Armenııanyń mindetti áskerı qyzmet merzimin qysqartý jospary týraly habarlaǵan edik.