Armenııada saıası qaıratker memleketke satqyndyq babymen kúdikke ilindi
ASTANA. KAZINFORM – Armenııanyń Tergeý komıteti «Mat Armenııa» partııasynyń jetekshisi Andranık Tevanıanǵa qatysty memleketke satqyndyq jáne tyńshylyq belgileri boıynsha qylmystyq is qozǵalǵanyn málimdedi, dep jazdy Armenpress.
Vedomstvonyń habarlaýynsha, is Armenııa Ulttyq qaýipsizdik qyzmetinen kelip túsken materıaldar negizinde qozǵalǵan.
Tergeý nusqasyna sáıkes, Andranık Tevanıan 2021 jylǵy parlament saılaýynda «Armenııa» blogyn qoldaǵan saıası qaıratker ári sol bloktyń tizimi boıynsha parlament depýtaty bolǵan.
Armenııa Tergeý komıtetiniń málimetinshe, ol 2024 jyly sheteldik arnaıy qyzmetter tarapynan tartylǵan.
– Tergeý deregine sáıkes, Tevanıan sheteldik arnaıy qyzmet ókiliniń tapsyrmasymen tyńshylyqpen aınalysyp, memlekettik qupııany qamtıtyn málimetterdi zańsyz jınap, olardy orys tiline aýdaryp, 622 myń AQSh dollary kólemindegi syıaqy úshin tapsyrǵan, – delingen habarlamada.
Aıtylǵan málimetter 2024 jyldyń sáýir aıynda Armenııa Ulttyq jınalysynda ótken jabyq qupııa otyrystyń barysy men qorytyndysyna qatysty bolǵan.
Tergeý komıteti bul áreketterdi Armenııanyń egemendigine, aýmaqtyq tutastyǵyna jáne syrtqy qaýipsizdigine nuqsan keltirgen memlekettik satqyndyq dep baǵalap otyr.
Qazirgi ýaqytta qylmystyq is Armenııa Qylmystyq kodeksiniń 418-babynyń 1-bóligi (memleketke satqyndyq) jáne 424-babynyń 1-bóligi (tyńshylyq) boıynsha tergelip jatyr.
Aıta keteıik, Armenııa zańnamasyna sáıkes, sottyń zańdy kúshine engen úkimi shyqqanǵa deıin aıyptalýshy kinásiz dep esepteledi.
Buǵan deıin habarlanǵandaı, Armenııa kórshiles eldermen shekarany delımıtatsııalaýdy aıaqtaýdy josparlap otyr.
