Armenııada koronavırýs juqtyrýdyń jańadan úsh jaǵdaıy tirkeldi

EREVAN. QazAqparat - 11 naýryz kúni Armenııada koronavırýs ınfektsııasyn juqtyrýdyń jańadan úsh jaǵdaıy tirkeldi, dep habarlaıdy «QazAqparat» HAA menshikti tilshisi Armenııa premer-mınıstri Nıkol Pashınıannyń málimdemesine silteme jasap.

Premer-mınıstrdiń aıtýynsha, koronavırýs Italııadan kelgen úsh jolaýshydan anyqtalǵan.

Úsh jolaýshynyń ekeýi 45 jáne 27 jastaǵy Armenııa azamaty bolsa, bireýi Armenııada jumys isteıtin 51 jastaǵy Italııa azamaty.

«Ókinishke oraı, búgin bizde koronavırýs juqtyrǵan úsh jańa jaǵdaı anyqtaldy. Olardyń úsheýi de Italııadan kelgen. Italııa azamaty men armenııalyq eki azamattyń bireýinde eshqandaı shaǵym joq. Al armenııalyq ekinshi azamattyń ókpesi qabynǵan», - deıdi Nıkol Pashınıan Facebook-tegi paraqshasynda.

Premer-mınıstrdiń aıtýynsha, aýrý juqtyrǵandar kimdermen qarym-qatynasta bolǵany anyqtalyp jatyr.

Eske sala ketsek, Armenııada COVID-19-ǵa shaldyǵýdyń alǵashqy jaǵdaıy 1 naýryzǵa qaraǵan túni anyqtaldy. Ol Irannan kelgen 29 jastaǵy Armenııa azamaty bolyp shyqty. Armenııa densaýlyq saqtaý mınıstrliginiń habarlaýynsha, onyń áıeline jasalǵan test teris nátıje kórsetken.

Qazirgi ýaqytta aýyrǵan adammen qarym-qatynasta bolǵan tulǵalar oqshaýlanyp, Tsahkadzor qalasyndaǵy «Golden Palace» qonaqúıinde karantınde jatyr.