Armenııada kıberqaýipsizdik jónindegi táýelsiz organ qurý usynyldy

ASTANA.KAZINFORM — Armenııada kıberqaýipsizdik jónindegi arnaıy táýelsiz organ qurý qolǵa alyndy. Bul týraly parlamenttiń turaqty komıtetiniń otyrysynda Armenııanyń joǵary tehnologııalyq ónerkásip mınıstri Mhıtar Aırapetıan málim etti, dep habarlaıdy Kazinform agenttiginiń menshikti tilshisi.

Onyń aıtýynsha, jańa memlekettik avtonomdy organ monıtorıng, táýekelderdi baǵalaý jáne kıberıntsıdentterge qarsy áreketti úılestirýmen aınalysady.

— Normatıvtik-quqyqtyq baza ómirlik mańyzdy qyzmetterdi kórsetý úshin paıdalanylatyn aqparattyq júıeler men mańyzdy aqparattyq ınfraqurylymdardyń úzdiksiz jumys isteýine, sondaı-aq óńdelgen, taratylatyn, saqtalatyn jáne jiberiletin aqparattyń qoljetimdiligin, tutastyǵyn jáne qupııalylyǵyn qamtamasyz etýge; kıber ıntsıdentter týraly habarlamaǵa, olardyń aldyn alý jáne qyzmet kórsetý jáne retteýdiń aǵymdaǵy talaptaryn qamtamasyz etýge qatysty máselelerdi qamtıtyn bolady, — dep atap ótti Aırapetıan.

Sonymen qatar, jańa organǵa memlekettik aqparattyq júıelerdi paıdalanýdy shekteý jáne derekter almasý deńgeıin retteý ókilettigi beriledi.

Bul maqsattarǵa qol jetkizý úshin jyl saıyn memlekettik bıýdjetten 4-6 mıllıard dram (shamamen 10,5–15,7 mıllıon AQSh dollary) aralyǵynda qarajat bólý josparlanǵan. Talqylaý qorytyndysy boıynsha bul bastama depýtattyq komıssııanyń oń qorytyndysyn aldy.

Buǵan deıin Qazaqstan prezıdenti Qaýipsizdik keńesiniń kıberqaýipsizdik máselelerine arnalǵan otyrysyn ótkizgeni habarlanǵan bolatyn.