Armenııada Qazaqstannyń týrıstik áleýeti tanystyryldy
EREVAN. QazAqparat – Erevanda tolyǵymen Qazaqstannyń týrıstik áleýetine arnalǵan «Týrıstik Armenııa» jýrnalynyń arnaıy shyǵyrylymynyń tanystyrylymy ótti. Bul týraly «QazAqparat» HAA menshikti tilshisi habarlaıdy.
Qazaqstannyń Armenııadaǵy Elshiliginiń bastamasymen el táýelsizdiginiń 28 jyldyǵyna oraı Erevanda «Týrıstik Armenııa Qazaqstanda» jýrnalynyń 28-shi arnaıy shyǵarylymynyń tanystyrylymy ótti. Jýrnaldyń bul sany tolyǵymen Qazaqstannyń týrıstik áleýetin kórsetýge arnalǵan.
Jýrnal týrızmdi damytý boıynsha memlekettik baǵdarlamany júzege asyrý aıasynda Qazaqstannyń Armenııadaǵy Elshiliginiń bastamasymen «Kazakh Tourism» ulttyq kompanııasymen birlesip daıyndalyp shyǵaryldy.
«Biz jýrnal tilshilerine ózdiginen Qazaqstandy aralaýǵa jáne bizdiń el týraly shynaıy materıal jazýǵa múmkindik bere otyryp, «Týrıstik Armenııa» mamandandyrylǵan beıindik jýrnalynyń jýrnalısterine usynys jasadyq. Jýrnalda qazaq qoǵamynyń mádenıeti men ómiriniń barlyq jaǵyn qarastyrdyq. Onyń ishinde ulttyq kıimder, taǵam, salt-dástúrler bar. Bir jaǵynan olar tek elordanyń ǵana emes, sonymen qatar Qazaqstan aımaqtarynyń tabıǵı jáne tehnogendik oryndary týraly aıtyp berdi», - dep atap ótti Qazaqstannyń Armenııadaǵy Elshisi Tımýr Orazaev tanystyrylym barysynda.
«Týrıstik Armenııa» jýrnalynyń bas redaktory Rýben Pashınıanniń aıtýynsha, basylymnyń shyǵarmashylyq toby osy joba boıynsha úlken qyzyǵýshylyqpen jumys istegen, al redaktsııa óz aýdıtorııasynan oń pikirler alyp úlgergen eken.
«Joba bastalmas buryn bizde Qazaqstan týraly aqparat shaǵyn boldy, ol tolyq shyǵarylymdy toltyrýǵa jetkiliksiz edi. Qazaqstan Elshiligi bizdiń jýrnalısterge issapar uıymdastyryp berdi. Biz Qazaqstanǵa kelip, osy elge ǵashyq bolyp qaıttyq. Osy mahabbatymyzdy jýrnalǵa ákelip syıdyrdyq. Jýrnaldyń shyǵarmashylyq toby aýqymdy jumystar atqardy, nátıjesi de birden kózge tústi. Onyń dáleli – oqyrmandar tarapynan «Qazaqstanda bolsam ǵoı» degen pikirlerdiń kóbeıýi, «Bul elge qalaı barýǵa bolady?», «Tikeleı áýe reısteri bar ma?» degen sekildi suraqtardyń tolastamaýy», - dep atap ótti R. Pashınıan.
«Týrıstik Armenııa» jýrnaly memlekettik mekemelerde, qonaqúılerde, aeroporttardyń aqparattyq ortalyqtarynda maqsatty aýdıtorııany qamtý qaǵıdasy boıynsha taratylady, al ony taratýda jýrnaldyń mazmunyna negizdelgen jeke tujyrym qoldanylady.
Rýben Pashınıanniń aıtýynsha, Qazaqstan Táýelsizdiginiń 28 jyldyǵyna arnalǵan arnaıy shyǵarylymyna joǵaryda atalǵan tujyrym qoldanylmaǵan eken.
Aıta ketý kerek, «Arloopa» ınteraktıvti qosymshasynyń qoldanýshylaryn tosynsyı kútip tur. Qosymshanyń jumys rejımi kezinde smartfon kamerasyn jýrnal muqabasyna jaqyndatsa, oqyrmandar Qazaqstan týraly beınerolıkti kóre alady.
