Erevanda qazaq-armıan bıznes forýmy ótýde
EREVAN. KAZINFORM – Erevanda Qazaqstan-Armenııa bıznes forýmy ótip jatyr. Forýmnyń kún tártibinde Qazaqstan men Armenııa arasyndaǵy saýda-ekonomıkalyq qarym-qatynasty, týrızm men logıstıkany damytý máseleleri bar. Bıznes-forýmǵa QR Saýda jáne ıntegratsııa mınıstri Arman Shaqqalıev pen AR Ekonomıka mınıstri Gevorg Papoıan, Qazaqstannyń Armenııadaǵy Elshisi Bolat Imanbaev, Armenııanyń Qazaqstandaǵy Elshisi Armen Gevondıan jáne ekonomıkanyń ártúrli salalarynyń 150-den astam ókilderi qatysýda.
Bıznes-forým aıasynda ekijaqty ekonomıkalyq qatynastarǵa jańa serpin beretin qujattar paketine qol qoıý josparlanýda.
Qazaqstandyq delegatsııa quramynda munaı-gaz, ónerkásip, quqyqtaný, qurylys, metallýrgııa, kólik jáne logıstıka, týrızm, kondıterlik ónimder óndirisiniń ókilderi bar.
Bıznes forým úsh sektsııaǵa bólingen: saýda-ekonomıkalyq yntymaqtastyq, logıstıka, týrızm. Sektsııalar aıasynda eki taraptyń ókilderi Qazaqstan men Armenııadaǵy bıznes ortanyń aǵymdaǵy jaı-kúıin, elderde bıznes júrgizý úshin bar jaǵdaılar men múmkindikterdi, Qazaqstan men Armenııa arasyndaǵy logıstıkany damytý áleýetin, sondaı-aq eki elge de eksporttyq múmkindikterin keńeıtýge múmkindik beretin jańa baǵyttardy damytýdy usyndy.
«Búgingi is-shara – saýda-ekonomıkalyq qatynastardy keńeıtýge, jańa ózara tıimdi ekonomıkalyq baılanystardy odan ári tereńdetýge jáne ornatýǵa tamasha múmkindik. Ekijaqty qarym-qatynastardy nyǵaıtýda Qazaqstan Respýblıkasynyń Prezıdenti Qasym-Jomart Toqaevtyń Armenııaǵa josparlanyp otyrǵan resmı sapary erekshe oryn alady. Armenııanyń Statıstıka komıtetiniń málimetinshe, 2023 jyly elderimiz arasyndaǵy taýar aınalymy aıtarlyqtaı ósti – 104 mln dollar, bul 2022 jylǵy kórsetkishterden 2,4 ese joǵary. Bul elderimizdiń ekijaqty saýda-ekonomıkalyq yntymaqtastyqty damytýǵa múddeli ekenin rastaıdy», - dep atap ótti Armenııanyń Ekonomıka mınıstri Gevorg Papoıan bıznes forýmǵa qatysýshylar aldynda sóılegen sózinde.
Óz kezeginde QR Saýda jáne ıntegratsııa mınıstri Arman Shaqqalıev forýmdy tarıhı dep atap, búginde taraptar jańa múmkindikter – bir-biriniń ekonomıkasyn tolyqtyrý ǵana emes, sonymen qatar úshinshi elderge eksporttyq baǵyttardy damytý týraly aıtyp jatqanyn atap ótti.
«Forýmdy tarıhı dep ataýǵa bolady. Búgin biz Memleket basshysynyń Armenııaǵa resmı sapary qarsańynda osyndaı aýdıtorııaǵa jınaldyq. Biz úshin Armenııa – ýaqyt synynan ótken senimdi dos. Rasynda, taýar aınalymymyz ósti. Saýdamen qatar ınvestıtsııalyq baılanystar da belsendi damyp keledi. Armenııadan Qazaqstanǵa quıylǵan tikeleı ınvestıtsııa kólemi shamamen 18,6 mln dollardy qurady.Qazaqstannan Armenııaǵa – shamamen 56 mln dollar. Árıne, bul shek emes. Búginde Qazaqstanda ekonomıkanyń túrli sektorlarynda Armenııa kapıtalynyń qatysýymen 380-nen astam kompanııa jáne 72 qazaq-armıan birlesken kompanııa jumys isteýde.
Qurylys jáne qurylys materıaldaryn óndirý sııaqty salalarǵa salynǵan ınvestıtsııa úlken úmit beredi. Biz ınfraqurylym, turǵyn úıler, áleýmettik jáne basqa da nysandardy salýda aıtarlyqtaı quzyret pen tájirıbe jınaqtadyq. Bizdiń kompanııalar Armenııada osyndaı jobalardy júzege asyrýǵa úlken qyzyǵýshylyq tanytýda. Biz óz kezegimizde armıan bıznesin aýyl sharýashylyǵy ónimderin, ásirese Qazaqstannyń batys aımaqtarynda óńdeý múmkindigin qarastyrýǵa shaqyramyz.
Aqtaýdaǵy kóliktik-logıstıkalyq qatysýymyzdy arttyrý bizge mýltımodaldy jetkizýge jańa múmkindik berip otyr. Irandyq baǵytty birge tolyq meńgerýimiz kerek. Bul jańa múmkindikter ashady. Óz tarapymyzdan eksportqa baǵyttalǵan jobalardy iske asyrýǵa baǵyttalǵan yntalandyrý sharalary paketin usynamyz. Biz ásirese qytaılyq baǵytty atap ótemiz. Armıan ónimderi Qytaıda óz satyp alýshysyn tabatynyna senimdimin», - dedi bıznes forýmǵa qatysýshylarǵa arnaǵan sózinde QR Saýda jáne ıntegratsııa mınıstri Arman Shaqqalıev.
Bıznes forým barysynda eki eldiń iskerlik orta jáne memlekettik qurylym ókilderi arasynda Qazaqstan men Armenııa arasyndaǵy ekijaqty ekonomıkalyq qarym-qatynastardy mazmundy mazmunmen tolyqtyrý boıynsha mazmundy kelissózder júrgizildi.
Forým aıasynda ekonomıka, saýda jáne óndiris salalaryndaǵy ekijaqty qarym-qatynastarǵa qosymsha serpin berýge arnalǵan qujattar paketine qol qoıý josparlanýda.
