Armenııada dońyz tumaýy dendep tur
ASTANA. QazAqparat - Armenııada 104 adam dońyz tumaýyna shaldyqqan. Densaýlyq saqtaý mınıstrliginiń habarlaýynsha,naýqastardyń bárinde H1N1 vırýsy zerthanalyq túrde rastalǵan, dep habarlady www.24.kz.
Mamandar epıdemııalyq jaǵdaı baqylaýda dep sendiredi. Dertten kóz jumǵandar joq. Dáriger kómegine júgingenderdiń barlyǵy tegin emdik preparattarmen qamtamasyz etilgen. Derti asqynǵan sanaýly adam aýrýhanaǵa jatqyzyldy, qalǵany ambýlatorlyq em qabyldaýda. H1N1 vırýsy Armenııada 2009 jyly tirkelgen bolatyn.
«Rastalǵan 104 derek boıynsha naýqastardyń barlyǵy tıisti emderin qabyldap, úılerine jiberildi. Bizde keshe aýyryp qalǵandar men búgin aýrýhanaǵa túskender bar. H1N1 tumaýynyń kádimgi aýyr jáne jeńil túrleri bar. Eger ýaqytyly kómek kórsetilmese, odan ókpe qabynýy múmkin, dep málimdedi Armenııa densaýlyq saqtaý mınıstrliginiń bas epıdemıology Vladımır Davıdıants.
Vırýstyń taralýynyń aldyn alý maqsatynda aýrýhanalar men emhanalarda karantın jarııalandy. Munymen qosa 10 myń adamǵa ekpe jasaldy. Olardyń qatarynda balalar men egde jastaǵy turǵyndar bar. Jaǵdaıdy baqylaý maqsatynda elde arnaıy jumys toby quryldy. Óıtkeni dońyz tumaýymen qatar Armenııada jedel respıratorly vırýsty ınfektsııalardyń sany artqany baıqalyp otyr. Búgingi kúnge deıin vırýsty ınfektsııany juqtyrǵan 662 adam tirkeldi, onyń 500-i - bala. Keleńsiz jaıttardyń oryn almaýy úshin dárigerler ýaqytyly mamandardyń kómegine júginýge keńes beredi.
Vladımır Davıdıants: «Armenııada epıdemııa joq ekenin resmı túrde jarııalaımyn. Men óz sózime jaýap beremin. Sebebi biz ótken jyldardyń kórsetkishterin saralaımyz. Osy saraptamalar qaýiptenetin eshtene joq ekenin dáleldeıdi», - degen túsindirme berdi.
