Armenııada depýtattar arasynda bolǵan tóbeleske baılanysty qylmystyq is qozǵaldy
EREVAN. KAZINFORM — Armenııanyń Bas prokýratýrasy parlament depýtattary arasynda bolǵan jappaı tóbeleske baılanysty qylmystyq is qozǵady, dep habarlaıdy Kazinform agenttiginiń Erevandaǵy menshikti tilshisi.
«News.am» agenttiginiń habarlaýynsha, atalǵan oqıǵaǵa qatysty Qylmystyq kodekstiń 297-baby 2-bóliginiń 1-tarmaǵy (Adamdar tobymen jasaǵan buzaqylyq) jáne 452-babynyń 3-bóligi (Laýazymdy tulǵanyń zańdy saıası qyzmetine aralasý maqsatynda kúsh qoldaný) boıynsha is qozǵalǵan.
Eske salaıyq, 29 qazanda Armenııa Ulttyq jınalysynyń (parlament — avt.) májilis zalynda oppozıtsııa jáne bılik partııalary depýtattarynyń arasynda tóbeles boldy. Janjal «Azamattyq kelisim» bılik partııasynyń depýtaty Taron Chahoıannyń baıandamasy kezinde bastalǵan, ıaǵnı, onyń minberden oppozıtsııalyq «Kúshti Armenııa» fraktsııasynyń ókilderine qatysty aıtqan sózderi Narek Karapetıannyń narazylyǵyn týdyrdy. Osydan keıin depýtattar sóz talastyryp, onyń sońy tóbeleske ulasty.
