Armenııada COVID-19 juqtyrǵandar sany artyp otyr

EREVAN. QazAqparat – Armenııada koronavırýs ınfektsııasyn juqtyrǵandar sany artyp otyr. Elde vırýstyń «omıkron» shtamy keń taralǵan. Bul týraly QazAqparat menshikti tilshisi habarlaıdy.

Armenııa Densaýlyq saqtaý mınıstrliginiń málimetinshe, 18-24 shilde aralyǵynda elde COVID-19 aýrýynyń 965 jańa jaǵdaıy tirkelgen (aldyńǵy aptadan 336 jaǵdaıǵa kóp). Sol kezeńde 547 adam saýyǵyp, 1 144 adam em aldy, 7 adam qaıtys boldy. Brıfıng barysynda Armenııa Densaýlyq saqtaý mınıstri Anaıt Avanesıan respýblıkada koronavırýsqa shaldyqqandar kóbeıgenin aıtyp, halyqqa vaktsınanyń úshinshi dozasyn alýǵa keńes berdi.

«Sońǵy aıda elimizde koronavırýs ınfektsııasyn juqtyrý jaǵdaıy artty. Bul shetelge saparlardyń kóbeıýine, saıahattardyń jandanýyna baılanysty. Ózderińiz biletindeı, Eýropada aýrý beleń alyp keledi. Biz muny boljaǵan edik, qazir jaǵdaıdy baqylap otyrmyz», - dedi A.Avanesıan.

Onyń aıtýynsha, qazirgi ýaqytta kovıdtik shekteý sharalaryn engizýge qajettilik joq.

Armenııa Densaýlyq saqtaý mınıstrliginiń basshysy kóp nárse azamattarǵa baılanysty ekenin atap ótti jáne halyqty medıtsınalyq mekemelerge barǵan kezde maska taǵýǵa, sondaı-aq COVID-19 vaktsınasynyń úshinshi dozasyn saldyrýǵa shaqyrdy.

Qazirgi ýaqytta Armenııada koronavırýs ınfektsııasyna baılanysty eshqandaı shekteý joq. Elge kirý úshin PTR-test nemese vaktsınatsııa týraly anyqtama qajet emes.