Armenııada chıkýngýnıa qyzbasynyń alǵashqy deregi tirkeldi
ASTANA. KAZINFORM — Armenııada chıkýngýnıa qyzbasynyń alǵashqy jaǵdaıy anyqtaldy, dep habarlaıdy Kazinform agenttiginiń Erevandaǵy menshikti tilshisi.
Armenııa Densaýlyq saqtaý mınıstrliginiń Ulttyq aýrýlardy baqylaý jáne aldyn alý ortalyǵy habarlaǵandaı, aýrý 2026 jylǵy 18 aqpanda tirkelgen.
Aldyn ala málimetter boıynsha, patsıent Seıshel araldaryna jasaǵan sapary kezinde juqtyrǵan, sebebi ınfektsııalanǵan jándiktiń shaǵýy arqyly taralǵan. Qazirgi tańda naýqastyń jaǵdaıy qanaǵattanarlyq dep baǵalanyp, mamandardyń baqylaýynda.
Chıkýngýnıa qyzbasyna tán ınkýbatsııalyq kezeń 2–12 kún. Negizgi belgileri — joǵary temperatýra, býyndar men bulshyqetterdegi aýyrsyný, teri bórtpesi, bas aýrýy jáne jalpy álsizdik. Keı jaǵdaılarda býyn aýyrsynýy birneshe aptaǵa sozylýy múmkin.
Seıshel araldary, Shrı-Lanka, Sýrınam, Bolıvııa jáne Kýbada chıkýngýnıa qyzbasynyń oshaǵy tirkelgen.
Mamandar vırýs komarlar arqyly taralatynyn jáne kóbinese tropıkalyq jáne sýbtropıkalyq aımaqtarda kezdesetinin eskertedi.
Buǵan deıin brıtandyq ǵalymdardyń deregi boıynsha, Eýropanyń 29 elinde ınfektsııa tasymaldaýshylarynyń taralý aımaǵy keńeıgendikten chıkýngýnıa qyzbasynyń órshý qaýpi bar ekeni habarlanǵan.