Armenııada balalarǵa jynystyq zorlyq-zombylyq kórsetkenderge jaza kúsheıedi
EREVAN. KAZINFORM – Armenııada balalarǵa jynystyq zorlyq-zombylyq jasaǵandarǵa jazany qatańdatý usynyldy. Tıisti zań jobasyn Іshki ister mınıstriniń orynbasary Armen Mkrtchıan parlamenttiń memlekettik-quqyqtyq máseleler jónindegi komıssııasynyń otyrysynda tanystyrdy, dep habarlaıdy Kazinform agenttiginiń Erevandaǵy menshikti tilshisi.
Zań jobasyna sáıkes, jábirlenýshimen tatýlasý nemese jasaǵan isine ókiný negizinde mundaı áreketke barǵan adamdardy qylmystyq jaýapkershilikten bosatýǵa tyıym salý kózdelgen. Osy rette vedomstvo ókili medıatsııa boıynsha toqtatylǵan isterdiń sanyn jarııalady. Máselen, 2023 jyly - 7, 2024 jyly - 4, al 2025 jyly 7 is tatýlasýmen aıaqtalǵan.
Armen Mkrtchıan atap ótkendeı, mundaı qylmystardyń qurbandary kóbine 16 jasqa tolmaǵandar, tıisinshe memleket olardy erekshe qorǵaýǵa alýy tıis. Osyǵan baılanysty balalarǵa qatysty jasalǵan jynystyq zorlyq-zombylyq úshin qylmystyq jaýapkershilikten bosatý múmkindigin alyp tastaý usynylyp otyr.
Munymen birge mınıstrlik ókili jezókshelikke tartylǵan kámeletke tolmaǵandardyń qyzmetin paıdalanǵandarǵa jaýapkershilik engizý bastamasyn kóterdi.
Eske salaıyq, 28 qazanda Armenııa parlamenti turmystyq zorlyq-zombylyqtyń aldyn alý jáne odan zardap shekken adamdardy qorǵaýǵa baǵyttalǵan zań jobasyn birinshi oqylymda qabyldady.
Qosa ketsek, taıaýda Armenııada depýtattar arasynda bolǵan tóbeleske baılanysty qylmystyq is qozǵaldy.
