Armenııada ár bala dúnıege kelgende birjolǵy tólem engizý usynyldy

ASTANA. KAZINFORM – Armenııada ár balanyń týý kezegine qaramastan 500 myń dram (shamamen 1300 AQSh dollary) kóleminde birjolǵy tólem engizý usynylyp otyr, dep habarlaıdy Kazinform menshikti tilshisi.

Tıisti zań jobasynyń bastamashysy – Armenııanyń Eńbek jáne áleýmettik máseleler mınıstrligi. Qazirgi ýaqytta memlekettik qoldaý saralanǵan jáne birinshi jáne ekinshi balanyń týylýyna 300 myń dram (shamamen 790 AQSh dollary), úshinshi jáne tórtinshi balaǵa 1 mln dram (shamamen 2600 AQSh dollary) jáne besinshi jáne odan joǵary balaǵa 1,5 mln dram (shamamen 3900 AQSh dollary) tólenedi.

Mınıstrlik 2026 jyldyń 1 qańtarynan bastap bir rettik tólemdi tek Armenııa azamattyǵy bar balalar ǵana ala alatynyn naqtylady. Bul rette 500 myń dram mólsherindegi birjolǵy tólemge kóshý 2026 jyldyń 1 qyrkúıeginen bastap josparlanǵan. 
Budan basqa, vedomstvo Armenııa úkimeti bir ýaqytta bala alty jasqa tolǵanǵa deıin aı saıynǵy tólemderdi 50 myń dram (130 dollar) kóleminde saqtaýdy usynyp otyrǵanyn atap ótti. Mundaı qoldaýdyń jalpy somasy bir balaǵa 3,6 mln dram (shamamen 9 400 dollar) nemese bir rettik tólemdi qosa alǵanda 4,1 mln dram (10 700 dollardan astam).

2021 jyldan beri úshinshi jáne odan keıingi balalardyń týylý sany 45%-ǵa – 8,3 myńnan 12,4 myńnan astamǵa deıin óskeni atap ótildi.

Buǵan deıin 2025 jyldyń 1 shildesinde eldiń turaqty halqynyń sany 3 mln 84 myń adam bolǵanyn jazdyq.