Armenııada «altyn» nómiri bar pasporttardy aýktsıon arqyly satý usynyldy

ASTANA. KAZINFORM – Armenııada erekshe tsıfrlar kombınatsııasy bar bıometrııalyq pasporttardy aqyly negizde berý júıesin engizý josparlanyp otyr. Eń sırek kezdesetin ári suranysqa ıe nómirler aýktsıon arqyly satylýy múmkin, dep habarlaıdy Kazinform agenttiginiń menshikti tilshisi Armenııanyń qoǵamdyq radıosyna silteme jasap.

«Zolotye» nomera v pasportah: kakýıý neobychnýıý ýslýgý obsýjdaıýt v Armenıı
Foto: newsarmenia.am

Bul týraly 4 qarashada Armenııa Іshki ister mınıstrligi Kóshi-qon jáne azamattyq qyzmetiniń basshysy Nellı Davtıan málimdedi.

Onyń aıtýynsha, pasport quny ondaǵy tsıfrlar kombınatsııasyna baılanysty belgilenedi. Nómir neǵurlym erekshe ári sırek kezdesetin bolsa, onyń baǵasy da soǵurlym joǵary bolýy múmkin.

– Belgili bir tsıfrlar kombınatsııasy úshin azamattar qosymsha aqy tóleıdi. Al eń sırek kezdesetin jáne tartymdy nómirler aýktsıonǵa shyǵarylady. Pasporttyń quny onyń nómirindegi tsıfrlar kombınatsııasyna baılanysty bolady. Kombınatsııa neǵurlym erekshe ári sırek kezdesse, baǵasy da soǵurlym joǵary bolýy múmkin, – delingen aqparatta.

Jańa baǵdarlamany 2027 jyly jurtshylyqqa tanystyrý josparlanǵan. Ázirge erekshe nómirlerdiń naqty baǵasy men aýktsıon ótkizý tártibi jarııalanǵan joq.

Armenııada bıometrııalyq pasporttar men jeke kýálikterdi berýdiń jańa júıesi 2026 jylǵy 1 qarashadan bastap jumys isteı bastady.

HAYPASS kompanııasynyń málimetinshe, alǵashqy úsh kúnde shamamen 7,7 myń ótinim túsken. Onyń 2,7 myńǵa jýyǵy azamattarǵa jeke qyzmet kórsetý barysynda óńdelgen.

Aıta keteıik, buǵan deıin Armenııada 1 qarashadan bastap turýǵa yqtııarhat alý tártibi ózgeretini habarlanǵan bolatyn. Jańa erejege sáıkes, ótinishter onlaın qabyldanyp, qujattardy rásimdeýge arnalǵan memlekettik baj mólsheri ulǵaıtyldy.