Armenııada alǵash ret Batys Nil vırýsyn juqtyrǵandar tirkeldi

ASTANA. KAZINFORM – Armenııanyń aýrýlardy baqylaý jáne aldyn alýdyń ulttyq ortalyǵy masadan adamǵa juǵatyn Batys Nil vırýsynyń elde alǵash ret taralýyn tirkedi. 20-ǵa jýyq adam aýrýhanaǵa jatqyzylyp, bir naýqas kóz jumǵan, dep habarlaıdy Kazinform tilshisi «Azatýtıýn» radıosyna silteme jasap.

Naýqastardyń jaǵdaıy ortasha jáne aýyr dep baǵalanyp otyr. Olardyń ishindegi eń jasy 25-te, eń egdesi 65-te.

Barlyq naýqastyń sozylmaly jáne aýyr syrqattary bar. Qaza bolǵan 60-tan asqan adamnyń da sozylmaly aýrýy bolǵan.

Armenııa Densaýlyq saqtaý mınıstrliginiń aýrýlardy baqylaý jáne aldyn alýdyń ulttyq ortalyǵynyń dırektory Stepan Atoıannyń aıtýynsha, bul aýrýdyń naqty emi joq, taǵaıyndalǵan em sımptomatıkalyq jáne bul vırýsqa qarsy vaktsına áli ázirlenbegen. Batys Nil vırýsyn kýleks (Culex pipiens) masalar taratady.

Armenııada Batys Nil vırýsyn juqtyrý jaǵdaılary negizinen eldiń ystyq aımaqtarynda - Ararat, Armavır jáne Aragatsotta tirkelgen.