Armenııada 8 adam koronavırýs juqtyrǵan

EREVAN. QazAqparat – 13 naýryz kúni Armenııada koronavırýs juqtyrýǵa qatysty taǵy eki oqıǵa tirkelgen. Osylaısha, 8 adamǵa ınfektsııa juqqan rastaldy. Úkimettiń sheshimi boıynsha, 23 naýryzǵa deıin barlyq bilim mekemeleri jabylady. Úkimet elde koronavırýsqa qarsy sharalardy kúsheıtti, dep habarlaıdy «QazAqparat» HAA-nyń menshikti tilshisi.

13 naýryzda Armenııanyń Densaýlyq saqtaý mınıstri Arsen Torosıan koronavırýsqa shaldyǵýdyń eki jańa oqıǵasy týraly málimdedi. Vırýs buǵan deıin Italııadan kelgen Echmıadzın qalasynda turatyn áıelmen baılanysta bolǵan adamdardan tabyldy.

«Italııadan kelgen áıelmen buǵan deıin baılanysta bolǵan qala turǵyndaryn oqshaýlaý kezinde synama taǵy eki adamnyń koronavırýs juqtyrǵanyn kórsetti. Osylaısha, aýrý juqtyrǵan adamdardyń sany 8-ge jetken», - dep málimdedi Armenııanyń Densaýlyq saqtaý mınıstri Facebook-tegi paraqshasynda.

Jergilikti BAQ-tyń habarlaýynsha, birshama ýaqyt buryn Italııadan kelgen Echmıadzın qalasynyń turǵyny oqshaýlaný týraly keńeske qulaq aspaı úılený toıyna barǵan.

Armenııa úkimeti elde vırýstyń taralýyna baılanysty 13 naýryz kúni keńes ótkizdi. Onyń qorytyndysy boıynsha, premer-mınıstr Nıkol Pashınıan Facebook -taǵy paraqshasynda 23 naýryzǵa deıig elde barlyq bilim mekemeleri jabylatynyn málim etti.

Sońǵy málimetter boıynsha, Armenııada koronavırýsqa shaldyǵýdyń 8 oqıǵasy tirkelgen. Birinshi oqıǵa 1 naýryzda buǵan deıin Irannan kelgen Armenııanyń 29 jastaǵy azamatynan anyqtaldy. 11 naýryzda Armenııanyń 45 jáne 27 jastaǵy eki azamaty jáne Italııanyń bir azamatynan (51 jasta) vırýs tabyldy. Olardyń úsheýi de Armenııaǵa Italııadan kelgen. 12 jáne 13 naýryzda taǵy eki oqıǵa tirkeldi.

Avtory Azamat Álmaǵambetov