Armenııada 4 adam sý tasqynynyń qurbany boldy
ASTANA. KAZINFORM —Armenııanyń eki oblysynda ózen tasýy saldarynan bolǵan sý tasqynynan zardap shekkender sany 4 adamǵa jetti. Qutqarýshylar joǵalǵandardy izdeýdi jalǵastyryp jatyr.
Armenııa Respýblıkasy Іshki ister mınıstrliginiń málimetinshe, eki oblystyń ártúrli eldi mekenderiniń qutqarýshylary sý basý aımaǵynda qalǵan 429 adamdy evakýatsııalap, qutqardy.
– Biraz ýaqyt buryn joǵalǵandardyń biriniń denesi tabyldy. Apat saldarynan 4 adam qaza tapty, - dedi jergilikti BAQ-qa Tótenshe jaǵdaıdy joıý ortalyǵynyń basshysy, aýmaqtyq ákimshilik jáne ınfraqurylym mınıstri Gnel Sanosıan.
Onyń aıtýynsha, sý tasqynynan zardap shekken aýdandarda 17 kópir, onyń ishinde 5-6 iri kópir qıraǵan. Kópirlerdiń buzylýy saldarynan keıbir eldi mekender arasyndaǵy baılanys úzildi nemese qıyndady, 5 myńnan astam adam oqshaýlanǵan aýyldarda qalyp qoıdy. 9 eldi meken negizgi joldardan ajyratylǵan. Eki oblystyń 3,5 myńǵa jýyq turǵyny jaryqsyz otyr. Birqatar eldi mekenderde gaz berý tolyq nemese ishinara úzilip, elektr jelileri, sý qubyrlary jáne basqa da ınfraqurylymdar buzylǵan.
– Temirjoldarǵa da aıtarlyqtaı úlken shyǵyn keltirildi. Shamamen 2,5 shaqyrymdy quraıtyn ártúrli ýchaskeler opyrylǵan. Temirjol qatynasyn qalpyna keltirý úshin birshama ýaqyt qajet. Memleketaralyq joldyń bes ýchaskesine eleýli zaqym keltirildi, biraq keshe júrgizilgen jumys joldyń zaqymdanǵanyna qaramastan, joldy qalypty ustaýǵa múmkindik berdi, - dedi Gnel Sanosıan.
Gnel Sanosıannyń aıtýynsha, elektr qýaty, gaz jáne sýdy kezeń-kezeńimen qalpyna keltirý jumystary júrgizilip jatyr. Sondaı-aq eldi mekender arasynda azamattardy tasymaldaý jáne azyq-túlik jetkizý úshin balamaly qatynas joldaryn uıymdastyrý jumystary júrgizildi.
