Armenııada 100-den asa qazaqstandyq kásiporyn turaqty jumys isteıdi

ASTANA. KAZINFORM — Armenııada qazaqstandyq kapıtaldyń qatysýymen 100-den asa kásiporyn turaqty jumys isteıdi. Bul týraly Premer-mınıstrdiń orynbasary — Syrtqy ister mınıstri Murat Nurtileý aıtty.

— Kelissózder barysynda aýyl sharýashylyǵy, ІT-tehnologııalar men jasandy ıntellekt, ınfraqurylym men logıstıka jáne basqa da mańyzdy salalar boıynsha yqpaldastyqty keńeıtýge degen ózara qyzyǵýshylyq tanyttyq. Sonymen birge, ekijaqty saýdadaǵy shaǵyn jáne orta bıznestiń úlesin ulǵaıtý, iskerlik forýmdardy ótkizý tájirıbesin jandandyrý máselelerine jiti toqtaldyq. Qazirgi ýaqytta Qazaqstanda 430-dan astam armıan kompanııasy tirkelgen bolsa, Armenııada qazaqstandyq kapıtaldyń qatysýymen 100-den asa kásiporyn turaqty jumys isteıdi. Eki eldiń tıimdi is-árekettestigi ortaq bıznesti damytýdyń jańa kókjıekterin ashyp, ózara túıisý núktelerin aıqyndaıdy, — dedi ol Armenııanyń Syrtqy ister mınıstri Ararat Mırzoıanmen kezdesýde.

Sondaı-aq mınıstr armenııalyq bıznes bizdiń elimizde qandaı salalarda is júrgizýge qyzyǵýshylyq tanytatynyn atap ótti.

— Áriptesterimizdiń «Qorǵas» ortalyǵynda bajsyz saýda dúkenderi jelisin uıymdastyrýyn tolyq quptaımyz. Buǵan qosa, armenııalyq bıznes Qazaqstannyń óńirlerinde óz saýda pavılondaryn ashýdy jalǵastyrýǵa nıet bildirdi, — dedi Murat Nurtileý.

Eske sala keteıik, ótken jyldyń sońynda eki el arasyndaǵy dostyq qarym-qatynas taqyrybynda aýqymdy shara ótken bolatyn.