Armenııada 10 tonnaǵa jýyq Nestlé NAN balalar taǵamy joıyldy
ASTANA. KAZINFORM — Armenııada Nestlé NAN ónimi qaýipti dep tanylǵan soń, balalar taǵamynyń 9,7 tonnasy joıyldy, dep habarlaıdy TASS.
Tamaq ónimderiniń qaýipsizdigin qadaǵalaıtyn ınspektsııalyq organnyń habarlaýynsha, ýtılızatsııa týraly sheshim zerthanalyq saraptama nátıjeleri negizinde qabyldanǵan, al bul nátıjeler Reseıden túsken.
Mamandar balalarǵa arnalǵan tez erıtin qurǵaq sút jáne sútqyshqyldy qospalarda qaýipti toksın bolýy múmkin ekenin aıtty. Ónimderdi joıý vedomstvo qyzmetkerleriniń baqylaýymen júrgizildi.
Buǵan deıin Nestlé kompanııasy 25 elde balalar taǵamynyń jekelegen partııalaryn keri qaıtaryp alǵanyn habarlaǵan. Tizimge NAN, SMA jáne BEBA brendteriniń ónimderi kirgen. Buǵan zııandy bakterııalar men toksınderdiń bolýy múmkin degen kúdik sebep bolǵan, olar júrek aıný men qusýdy týdyrýy yqtımal.
Sonymen qatar kompanııa qazirgi ýaqytqa deıin atalǵan ónimdi tutynyp, ýlaný jaǵdaılary nemese basqa da sımptomdar tirkelmegenin jetkizdi.
Aıta keteıik, «Nestle Reseı» shıkizatta toksın bar bolýy qaýpine baılanysty Qyrǵyzstandaǵy bólshek saýda jelisinen balalar taǵamynyń belgili bir partııalaryn erikti túrde keri qaıtaryp alý týraly sheshim qabyldady.
«Nestle Food Kazakhstan» JShS Qazaqstan aýmaǵynda saqtyq sharasy retinde balalar taǵamynyń shekteýli partııalaryn erikti túrde keri qaıtaryp jatyr. Bul sheshim syrtqy jetkizýshiden alynǵan shıkizatta tsereýlıd toksıniniń bolýy múmkin degen yqtımal qaýipke baılanysty qabyldanǵan.
Tsereýlıd — qusý, ish ótý jáne ishtiń aýyrýyn týyndatýy múmkin ýytty zat.
Sondaı-aq buǵan deıin Nestlé, Danone jáne Lactalis ýytty zatqa baılanysty sút qospalaryn keri qaıtaryp jatqany týraly jazdyq. Álemdegi eń iri úsh sút ónimi kontserni anyqtalǵan tsereýlıd lastanýynan keıin balalarǵa arnalǵan sút qospalarynyń iri partııalaryn naryqtan alyp tastady.
