Armenııada 1 qarashadan bastap turýǵa yqtııarhat alý tártibi ózgeredi
ASTANA. KAZINFORM — 2026 jylǵy 1 qarashadan bastap Armenııada turýǵa yqtııarhat alý tártibine ózgerister engiziledi. Qujattardy rásimdeýge ótinishter onlaın qabyldanady, sondaı-aq memlekettik baj mólsheri artady, dep habarlaıdy Kazinform Arminfo agenttigine silteme jasap.
Armenııa Іshki ister mınıstrliginiń málimetinshe, turýǵa yqtııarhat alý úshin ótinishter arnaıy onlaın-platforma arqyly beriledi. Al turý kartasy men anyqtamany ótinish berýshiler saýsaq izderin tapsyryp, elektrondyq qoltańbasyn usynǵannan keıin jeke ózi alýy kerek.
Memlekettik baj mólsheri de ósedi. Ýaqytsha turýǵa yqtııarhat alý quny 105 myń dramnan (shamamen 133 myń teńge) 150-155 950 dramǵa (shamamen 190-197 myń teńge) deıin qymbattaıdy. Al turaqty turýǵa yqtııarhat úshin tólem 140 myń dramnan (shamamen 177 myń teńge) 250 myń dramǵa (shamamen 317 myń teńge) deıin ósedi.
Budan bólek, elde zańdy turatynyn rastaıtyn kýálik úshin 30 myń dram (shamamen 38 myń teńge) kóleminde jańa memlekettik baj engiziledi.
Tólem qujattardy qarastyrǵany úshin alynatyndyqtan, turýǵa yqtııarhat berýden bas tartylǵan jaǵdaıda aqsha qaıtarylmaıdy.
Jeke kásipkerler Armenııada naqty kásipkerlik qyzmetpen aınalysatynyn rastaýy kerek. Mysaly, bank shotyndaǵy qarajat nemese tıisti aınalym týraly málimet usynýy qajet. Sondaı-aq el úkimeti jeke kásipkerlerdi qosa alǵanda, turýǵa yqtııarhat berýge jyl saıynǵy kvota belgileýge quqyly bolady.
Armenııada 183 kún jáne odan da kóp ýaqyt bolmaǵan sheteldikter bul týraly atalǵan merzim aıaqtalǵannan keıin 10 kúnnen keshiktirmeı onlaın-platforma arqyly habarlaýǵa tıis. Bul talap ınvestıtsııa nemese aıryqsha eńbegi úshin turaqty mártebe alǵan adamdarǵa qoldanylmaıdy.
Sonymen qatar sheteldik azamat elde zańdy turatynyn rastaıtyn bir ǵana mártebege ıe bola alady.
2027 jylǵy 1 qańtardan bastap Armenııada eńbek qyzmetimen aınalysý úshin jumys vızasyn alý mindetteledi. Onyń quny 15 myń dram (shamamen 19 myń teńge) bolady. Al 10 jyldyq arnaıy mártebe endi berilmeıdi.
2026 jylǵy 1 qarashaǵa deıin tapsyrylǵan ótinishter burynǵy tártippen qaralady. Al buǵan deıin berilgen qujattar men mártebelerdiń merzimi aıaqtalǵansha zańdy kúshi saqtalady.
Eske salaıyq, buǵan deıin Armenııanyń jańa Konstıtýtsııa jobasynyń mátini bıyl qarasha aıynda jarııalanatynyn habarlaǵanbyz.
