Armenııa UQShU-ǵa qaıta oralýdy kózdep otyrǵan joq — Ararat Mırzoıan
EREVAN. KAZINFORM — Armenııa óz ustanymyn ózgertpeıdi jáne Ujymdyq qaýipsizdik týraly shart uıymyna (UQShU) qaıta oralýdy kózdep otyrǵan joq. Bul týraly eldiń Syrtqy ister jáne halyqaralyq saýda mınıstri Ararat Mırzoıan málimdedi, dep habarlaıdy Kazinform agenttiginiń Erevandaǵy menshikti tilshisi.
Ararat Mırzoıan Erevanda Slovenııanyń Syrtqy jáne eýropalyq ister mınıstri Tone Kaızermen kezdesý ótkizip, keıin olar birlesken baspasóz máslıhaty barysynda BAQ ókilderiniń saýalyna jaýap berdi. Onda mınıstr UQShU aıasyndaǵy máselelerge qatysty da pikir bildirdi.
— Biz bul uıymnyń jumysyna qatysýdy áldeqashan doǵaryp, múshe el mártebesindegi qyzmetimizdi toqtatyp qoıdyq. Eger onyń basqa músheleri nemese hatshylyǵy qandaı da bir pikir bildirip jatsa, munyń bári beker. Biz óz ustanymymyzdy ózgertpeımiz jáne UQShU-ǵa qaıta oralýdy kózdep otyrǵan joqpyz, — dep jaýap berdi Ararat Mırzoıan BAQ ókilderiniń saýalyna.
Eske salaıyq, taıaýda Armenııanyń premer-mınıstri Nıkol Pashınıan Eýrazııalyq ekonomıkalyq odaq memleketteriniń uıymǵa múshe basqa eldi onyń quramynan shyǵarýǵa quqyǵy joq ekenin málimdep edi.
Buǵan deıin habarlaǵanymyzdaı, Armenııa úkimeti jańa Konstıtýtsııany qabyldaý úshin kezekten tys parlament saılaýyn ótkizýi múmkin.
